4Ɩsɔ kʋpɑntʋ tɔɔ kɛ́ ɩ tʋ-tʋɣʋ tǝmlɛ tǝnɛ tǝ lɑpʋ, nɑ pǝ tɔɔ kɛ́ tɩɩ lɔɔkɩ tɑ́ ɑpɑlʋtʋ. 2 Tɑ́ lɔwɑ mukɑɣɑ kʋlɑpʋtʋ fɛɛlɛ fɛɩ nyǝntʋ. Tɩɩ hʋ́lǝ́ɣɩ́ tǝkpɑɑlǝtʋ. Tɩɩ kɛɛ Ɩsɔ Tɔm, ɑmɑ tɑmpɑnɑ kɛ tǝ hʋ́lǝ́ɣɩ́ tǝcɛɩcɛɩ, nɑ tǝ́ lɑkɩ ḿpʋ́ɣʋ́ Ɩsɔ ɩsɛntɑɑ kɛ́ sɩ yǝlɑɑ ɩ́ tʋ pɑ lɑɑkɑlɩ kɛ tɑ́ tɔɔ nɑ pɑ́ nɑ́. 3 Pǝ tɔɔ kɛ́ Lɑɑpɑɑlɩ Kʋpɑŋ wei tǝ kpɑɑlǝɣɩ tɔ ɩ tɑ kɛ muku tɔm. Amɑ mpɑ pɑ lepɑ tɔɣɔ ɩ kɛ́ muku tɔm. 4 Antulinyɑ ɩnɛ ɩ tɑɑ ɩlɔɣɔʋ mɛlǝmǝnɑ-wɛ nɑ pɑɑ tɛŋ pɑ tɑɑ nɑ Ɩsɔ. Antulinyɑ tɑɑ ɩlɔɣɔʋ ɩnɩ ɩ kentinɑ-wɛ sɩ pɑ́ tɑɑ nɑ Kilisiti teeli Lɑɑpɑɑlɩ Kʋpɑŋ yelɑɑ nɑ pǝ́ nɑ́ tǝnyɑɩɩ kɛ ɩsǝnɑ mpi tɔ. Kilisiti ɩnɩ ɩ kɛlǝnɑ Ɩsɔ tǝtɛŋɛlɛŋ. 5 Pǝ tɑɣɑ tɑ́ mɑɣɑmɑɣɑ tɑ́ tɔm kɛ tǝ lɑkɩ wɑɑsʋ. Amɑ Yesu Kilisiti tɔɔ nyǝntʋ kɛ tǝ kpɑɑlǝɣɩ sɩ Tɑcɑɑ kɛlɛ. Nɑ Yesu tɔɔ kɛ́ tǝ yɑɑkɩ tɑ́ tǝɣɩ mǝ tǝmlɛ nyǝ́mɑ. 6 Ɩsɔ wei ɩ yɔɣɔtɑɑ sɩ pǝ́ nɑ́ nɑ sǝkpɛtʋɣʋ cɛ tɔ, kʋlʋm ɩnɩ ɩ lɑpǝnɑ nɑ pǝ nɑ́ tɑ́ lotu tɑɑ sɩ tǝ nyɩ tǝcɛɩcɛɩ kɛ́ Ɩsɔ teeli wei ɩ nɑ́ Kilisiti ɩsɛntɑɑ tǝnyǝnǝnyǝnɩ tɔ. <div eID="gen26563" type="x-p"/> 7 Amɑ tɑ́ mpɑ tǝ tɔkɑ Ɩsɔ kʋpɑmpɑm pǝnɛ tɔ tǝ wɛ kɛ́ ɩsɩɩ cʋɣʋ wontu. Pǝ lɑpɑ ḿpʋ́ɣʋ́ sɩ pɑ́ nɑ́ teu sɩ Ɩsɔ hɑnɑ-tʋɣʋ tomɑ sɔsɔɔnɑ ɑnɛɣɛ kʋhɑʋ, pǝ tɑɣɑ tɑ́ mɑɣɑmɑɣɑ tɑ́ nyǝnɑ. 8 Kʋnyɔntɔɣɔlɛnɑɑ kɛ wɑɑnɩ wɑɑnɩ pɩɩnɑ-tʋ, ɑmɑ tǝ tɑ kpisi. Nǝɣǝsɛɛ nɑ́ kʋɣɩ-tʋ, pɑɑ nɑ mpʋ tɩɩ yeki tɛɛlʋɣʋ. 9 Pɑ tʋɣɩ-tʋɣʋ kʋnyɔŋ, ɑmɑ Ɩsɔ ɩ́lɛ́ ɩ tɑ lɔ-tʋ. Pɑ huɣi-tʋɣʋ ɑtɛ, ɑmɑ pɑɑ nɑ mpʋ pɑ tɑ kʋ-tʋ. 10 Tɑm tǝ sǝkɩ Kilisiti sǝm kɛ tɑ́ tɔnǝŋ tɑɑ kɛ́ sɩ pǝ́ hʋ́lɩ́ tɑ́ tɔnǝŋ kʋlʋmǝŋ ɩnɩ ɩ tɑɑ kɛ́ ɩ weesuɣu. 11 Tǝ wɛʋ nɑ tɑ́ ɩsɛ kɛ ɩsǝntɔ tɔ, tɑm kɛ́ tǝ wɛ sǝm nɔɔsɩ tɑɑ kɛ́ Yesu tɔɔ, sɩ pǝ́ hʋ́lɩ́ sɩ ɩ weesuɣu wɛnnɑ tɑ́ tɔnǝŋ kʋsǝpǝŋ ɩnɛ ɩ tɑɑ. 12 Ḿpʋ́ɣʋ́ pǝ wɛɛ, sǝm wɛnnɑ tɑ́ tɑɑ nɑ pǝ́ lɑkɩ nɑ weesuɣu nɑ́ɑ́ wɛɛ mǝ tɑɑ nɑ kʋ́ lɑkɩ. <div eID="gen26564" type="x-p"/> 13 Pɑ ŋmɑɑwɑ Ɩsɔ Tɔm tɑɑ sɩ: Mɑ tɛmɑ mɑ tɑɑ nɑ Ɩsɔ tɔɣɔ mɑ yɔɣɔtɑɑ. Tɑ́ tɔtɔ tɑ́ hʋwɛɛ wɛ tɑɑ tɛmnɑʋ mpɩ pǝ tɔm tɑɑ tɔɣɔ tǝ tɛmɑ tɑ tɑɑ nɑ Ɩsɔ nɑ pǝ tɔɔ kɛ́ tɑ́ nɔɔsɩ tɔɔ ɩɩ suŋ. 14 Pǝ tɑɣɑ pʋlʋ, tǝ nyǝmɑ́ sɩ Yesu sǝpɑ nɑ Ɩsɔ feesi-ɩ tɔ ɩ kɑ́ tɛ nɑ ɩ́ feesi-tʋ nɑ Yesu, nɑ ɩ́ lɑ́ nɑ tɑ́ nɑ-mɛ tǝ́ sǝŋ ɩ ɩsɛntɑɑ. 15 Mǝ tɔɔ kɛ́ pǝ tǝnɑɣɑ mpʋ pǝ lɑkɩ, Ɩsɔ tɔŋnɑ ɩ pɛɛlɛɛ hʋ́lʋ́ɣʋ́ kɛ yǝlɑɑ pɑɣɑlɛ kɛ tɑm kɛ́ sɩ ɩ́ lɑ nɑ yǝlɑɑ mpɛ pɑ sɑmɑɑ pɑɣɑlɛ sɛɛ-ɩ sɩ ɩ́ nɑ tǝmlɛ, nɑ pǝ́ kʋsɩ ɩ teeli. <div eID="gen26565" type="x-p"/> <div eID="gen26562" type="section"/> 16 Pǝ tɔɔ kɛ́ tɩɩ lɔɔ tɑ́ ɑpɑlʋtʋ kɛ pɑɑ pǝcɔ. Pɑɑ pǝ wɛɛ sɩ tɑ́ tɔnʋɣʋ tɔɔ tɔŋnɑ cɑɑmʋɣʋ kɛ pǝcɔ tɔ, tɑ́ tɑɑ nɑ́ tɔŋnɑ toŋ sɔɔsʋɣʋ kɛ pɑɑ kʋyɑŋkuɣu. 17 Kʋnyɔmisi nsi sɩ mɑkʋɣʋnɑ-tʋɣʋ wɑɑtʋ wɑɑtʋ tɔ sɩ tɑɣɑnǝɣɩ-tʋɣʋ teeli tɑɑ teeli wei ɩ kɑɑ tɛ tɔɣɔ, nɑ teeli ɩnɩ ɩ kǝlɑ kʋnyɔmǝŋ ɩnɩ tǝcɑɣɑcɑɣɑ. 18 Pǝ tɑɣɑ mpi pǝ nyǝnǝɣɩ tǝkeelee tɔ pǝ tɔɔ kɛ́ tǝ tʋ tɑ́ lɑɑkɑlɩ, ɑmɑ mpi pɩɩ nɑɑkɩ tɔ pǝ tɔɔ kɛ́. Mpi pǝ nɑɑ tǝkeelee tɔ pǝlɛ pɩɩ leeliɣi. Amɑ mpi pɩɩ nɑɑ tɔ pǝlɛ pǝ wɛ tɑm tɔɔ. <div eID="gen26567" type="x-p"/> <chapter eID="2Cor.4.seID.22338"/>