Anoratidzwa Mwari ari pachigaro cheushe kudenga

4Shure kweizvi ndakaona, zvino tarira, mukova wakazaruka kudenga, nenzwi rekutanga randakanzwa rakaita serehwamanda richitaura neni, richiti: Kwira pano, ndigokuratidza zvinhu zvinofanira kuitika shure kweizvi.

2 Zvino pakarepo ndakava muMweya; zvino tarira, chigaro cheushe chakagadzwa kudenga, nepamusoro pechigaro cheushe umwe agere.

3 Iye waiva agere pakuonekwa waiva akafanana nebwe rejasipisi* nesadhio*; nemurarabungu wakakomberedza chigaro cheushe waitaridzika sebwe reemaradhi*.

4 Zvino zvigaro zveushe makumi maviri nezvina zvaiva zvakakomberedza chigaro cheushe; nepazvigaro zveushe ndakaona vakuru makumi maviri nevana vagere, vakapfeka nguvo chena, uye vaiva vane korona dzegoridhe pamisoro yavo.

5 Nepachigaro cheushe pakabuda mheni nekutinhira nemanzwi; nemwenje minomwe yemoto ichipfuta pamberi pechigaro cheushe, iri Mweya minomwe yaMwari.

6 Zvino pamberi pechigaro cheushe paiva pane gungwa regirazi, rakafanana nekrisitaro*. Nepakati pechigaro cheushe nepakapoteredza chigaro cheushe pane zvisikwa zvina zvipenyu zvizere nemeso mberi neshure.

7 Zvino chisikwa chipenyu chekutanga chaiva chakafanana neshumba, uye chisikwa chipenyu chechipiri chakafanana nemhuru, nechisikwa chipenyu chechitatu chaiva chine chiso semunhu, nechisikwa chipenyu chechina chaiva chakafanana negondo rinobhururuka.

8 Nezvisikwa zvipenyu izvi chimwe nechimwe chaiva chine mapapiro matanhatu mativi ose, nemukati zvaiva zvizere nemeso; uye hazvizorori masikati neusiku, zvichiti: Mutsvene, mutsvene, mutsvene, Ishe Mwari, Wemasimbaose, waiva aripo, uye aripo, neachazouya.

9 Zvino apo zvisikwa zvipenyu izvi pazvaimupa kubwinya nerukudzo nekuvongwa iye anogara pachigaro cheushe, iye anorarama kusvika rinhi narinhi,

10 vakuru makumi maviri nevana vakazviwisira pasi pamberi peagere pachigaro cheushe ndokumunamata iye anorarama kusvika rinhi narinhi, uye vachikandira korona dzavo pamberi pechigaro cheushe, vachiti:

11 Makafanira, Ishe, kugamuchira kubwinya, nerukudzo, nesimba; nokuti ndimwi makasika zvinhu zvose, uye nekuda kwechido chenyu zviripo uye zvakasikwa.