Mirairo yenzvimbo tsvene

44Zvino wakandidzosa nenzira yesuwo renzvimbo tsvene yekunze, raiva rakatarisa kumabvazuva; uye raiva rakavharwa.

2 Zvino Jehovha wakati kwandiri: Suwo iri richavharwa, haringazarurwi, uye hakuna munhu achapinda naro, nokuti Jehovha Mwari waIsraeri wapinda naro; naizvozvo richavharwa.

3 Rive remuchinda, muchinda, iye achagaramo kuti adye chingwa pamberi paJehovha; achapinda nenzira yeberere resuwo, uye achabuda nenzira yaro.

4 Zvino wakandiunza nenzira yekusuwo rekumaodzanyemba pamberi peimba; zvino ndakaona, uye tarira, kubwinya kwaJehovha kwakazadza imba yaJehovha. Zvino ndakawira pasi nechiso changu.

5 Zvino Jehovha wakati kwandiri: Mwanakomana wemunhu, isa moyo wako, zvino uone nemeso ako, uye unzwe nenzeve dzako, zvose zvandinoreva kwauri maererano nezvimiso zvose zveimba yaJehovha, uye maererano nemirairo yayo yose; uye isa moyo wako pakupindwa kwemuimba, nepakubudiwa pose penzvimbo tsvene.

6 Zvino uchati kuvapanduki, kuimba yaIsraeri: Anoreva seizvi Ishe Jehovha: Zvakwana kwamuri, nekuda kwezvinyangadzo zvenyu zvose, imwi imba yaIsraeri!

7 Nokuti makapinza vatorwa, vasina kudzingiswa pamoyo, nevasina kudzingiswa panyama, kuti vave munzvimbo yangu tsvene, kuti vaisvibise, imba yangu, pamunopa chingwa changu, mafuta, neropa, uye vachiputsa sungano yangu nekuda kwezvinyangadzo zvenyu zvose.

8 Zvino hamuna kuchengetedza zvinhu zvangu zvitsvene, asi makazvimisira vachengeti vezvirindo zvangu munzvimbo yangu tsvene.

9 Anoreva seizvi Ishe Jehovha: Hakuna mutorwa, asina kudzingiswa pamoyo, kana asina kudzingiswa panyama, achapinda munzvimbo yangu tsvene, pamutorwa upi neupi ari pakati pevana vaIsraeri.

10 Asi vaRevhi vakaenda kure neni, Israeri paakatsauka, vakadzungaira vachibva kwandiri kutevera zvifananidzo zvavo, vachatakurawo uipi hwavo.

11 Zvakadaro vachava vashumiri panzvimbo yangu tsvene, munzvimbo dzekutarisira pamasuwo eimba, uye vachashumira muimba; ivo vachauraya chipo chinopiswa nechibairo chevanhu; uye ivo vachamira pamberi pavo kuti vashumire kwavari.

12 Nokuti vakashumira kwavari pamberi pezvifananidzo zvavo, nekuva chigumbuso chechitadzo kuimba yaIsraeri, naizvozvo ndavasimudzira ruoko rwangu, anoreva Ishe Jehovha, zvino vachatakura uipi hwavo.

13 Zvino havangaswederi kwandiri kuti vaite basa reupristi kwandiri kana kuswedera kune zvinhu zvangu zvose zvitsvene, kune zvinhu zvitsvene-tsvene, asi vachatakura chinyadzo chavo nezvinyangadzo zvavo zvavakaita.

14 Asi ndichavaita vachengetedzi veutariri hweimba, pashumiro yayo yose, nepazvose zvichaitwa mairi.

15 Asi vapristi vaRevhi, vanakomana vaZadhoki, vaichengeta utariri hwenzvimbo yangu tsvene, vana vaIsraeri pavakatsauka kubva kwandiri, ivo vachaswedera kwandiri kuti vashumire kwandiri, uye vachamira pamberi pangu kupa kwandiri mafuta neropa, anoreva Ishe Jehovha.

16 Ivo vachapinda munzvimbo yangu tsvene, uye ivo vachaswedera kutafura yangu, kuti vandishumire, uye vachachengeta utariri hwangu.

17 Zvino zvichaitika, pavachapinda mumasuwo echivanze chemukati, vachafukidzwa nenguvo yemucheka wakapfava, uye hakuna makushe achauya pamusoro pavo, pavanenge vachishumira pamasuwo echivanze chemukati, nemukati.

18 Vachava nenguwani dzemucheka wakapfava pamusoro pemusoro wavo, uye vachava nezvikadubura zvemucheka wakapfava pazviuno zvavo; havangazvisungi chiuno nechinhu chinodikitirisa.

19 Zvino pavanobuda kuenda kuchivanze chekunze, kuchivanze chekunze kuvanhu, vachabvisa nguvo dzavo dzavanoshumira nadzo, ndokudziisa mumakamuri matsvene, ndokupfeka dzimwe nguvo, uye havangaiti vanhu vatsvene nenguvo dzavo.

20 Zvino havangaveuri musoro wavo, uye havangatenderi mhotsi dzavo dzikure dzirebe; vachangoguririra misoro yavo.

21 Zvino mupristi upi neupi haanganwi waini pakupinda kwavo muchivanze chemukati.

22 Zvino havangatori chirikadzi kana wakarambiwa kuva vakadzi vavo, asi vachatora mhandara dzembeu yeimba yaIsraeri kana chirikadzi yakambova chirikadzi yemupristi.

23 Zvino vachadzidzisa vanhu vangu musiyano pakati pezvitsvene nezvakasvibiswa, nekuvazivisa pakati pezvisakachena nezvakachena.

24 Zvino pakupikisana ivo vachamira pamutongo; vachautonga zvichienderana nemitongo yangu; uye vachachengeta mirairo yangu nemitemo yangu pavungano dzangu dzose, uye vachaita masabata angu matsvene.

25 Zvino havangasviki pamunhu wakafa kuti vazvisvibise; asi vangazvisvibisa nekuda kwababa, kana nekuda kwamai, kana nekuda kwemwanakomana, kana nekuda kwemwanasikana, nekuda kwehanzvadzikomana, kana nekuda kwehanzvadzisikana asina kumbova nemurume.

26 Zvino shure kwekunge anatswa, vachamuverengera mazuva manomwe.

27 Zvino pazuva raanoenda kunzvimbo tsvene, kuchivanze chemukati, kunoshumira panzvimbo tsvene, achapa chipo chake chechivi, anoreva Ishe Jehovha.

28 Zvino iyi ichava nhaka kwavari: Ndiri nhaka yavo; zvino imwi hamungavapi fuma kwaIsraeri. Ndiri fuma yavo.

29 Ivo vachadya chipo chechidyiwa, nechipo chechivi, nechipo chechitadzo; nechinhu chipi nechipi chakatsaurwa kwaIsraeri chichava chavo.

30 Nechekutanga chechezvibereko zvose zvekutanga zvezvose, nechipo chose chezvose, kuzvipo zvenyu zvose, zvichava zvemupristi; muchapawo kumupristi zvekutanga zvemukanyiwa wenyu, kuti mugarise ropafadzo mudzimba dzenyu.

31 Vapristi havangadyi chipi nechipi chakafa choga kana chakabvamburwa pashiri kana pamhuka.