Mufananidzo wemakondo nemuzambiringa

17Zvino shoko raJehovha rakasvika kwandiri richiti:

2 Mwanakomana wemunhu, ita chirabwe, utaure nemufananidzo kuimba yaIsraeri;

3 zvino uti: Anoreva seizvi Ishe Jehovha: Gondo guru, rine mapapiro makuru, reminhenga mirefu, rizere mambava, ane mavara-mavara, rakauya kuRebhanoni ndokutora musoro wemusidhari.

4 Rakaguririra musoro wematavi awo matsva, ndokuutakurira kunyika yekutengeserana, rakauisa muguta revatengesi.

5 Rakatorawo pambeu yenyika, ndokuiisa mumunda wembeu, rakaiisa pamvura zhinji, kuiisa semikonachando.

6 Zvino yakatunga ndokuva muzambiringa unotanda, mupfupi paurefu, matavi awo atarire kwariri, nemidzi yawo ive pasi pawo. Saizvozvo wakava muzambiringa, wakabudisa matavi ndokutunga utavi udiki.

7 Kwaivawo nerimwe gondo guru, rine mapapiro makuru, nemambava mazhinji; zvino tarira, muzambiringa uyu wakarerekera midzi yawo kwariri, ndokutungirawo matavi awo kwariri, kuti uridiridze nemigero yenzvimbo yakadzvarwa.

8 Wakasimwa pamunda wakanaka pamvura zhinji, kuti ubudise matavi, nekubereka chibereko, kuti uve muzambiringa wakanakisisa.

9 Uti: Anoreva seizvi Ishe Jehovha: Uchabudirira here? Haungadzuri midzi yawo here, nekugura chibereko chawo, usvave? Uchasvava pamashizha awo ose emabukira, uye kwete nesimba guru kana nevanhu vazhinji, kuudzura nemidzi yawo.

10 Hongu, tarira, wasimwa uchabudirira here? Hauchasvavi chose here mhepo yemabvazuva paichaubata? Uchasvava mumigero mawakamera.

11 Zvino shoko raJehovha rakasvika kwandiri richiti:

12 Iti ikozvino kuimba inopanduka: Hamuzivi here kuti zvinhu izvi chii? Reva: Tarirai, mambo weBhabhironi wakasvika kuJerusarema, uye watora mambo waro nemachinda aro ndokuvauisa kwaari kuBhabhironi.

13 Zvino wakatora pambeu yeumambo, ndokuita sungano naye, ndokumupinza pamhiko, uye wakatora vane simba venyika;

14 kuti ushe huderere, kuti hurege kuzvikudza, kuti nekuchengetedza sungano yake humire.

15 Asi wakamupandukira pakutumira nhume dzake kuEgipita, kuti vamupe mabhiza nevanhu vazhinji. Achabudirira here? Achapukunyuka here anoita zvakadaro? Kana achavhuna sungano achapukunyuka here?

16 Neupenyu hwangu, anoreva Ishe Jehovha, zvirokwazvo panzvimbo yamambo wakamuita kuti ave mambo, mhiko yake yaakazvidza, uye sungano yake yaakavhuna, achafa pamwe naye mukati meBhabhironi.

17 Uye Farao nehondo huru neboka rakawanda haangamubatsiri pahondo, nekututira murwi uye nekuvaka nhare, kugura vanhu vazhinji.

18 Nokuti wakashoora mhiko, nekuputsa sungano; nokuti tarira, apa ruoko rwake, uye aita zvose izvi, haangapukunyuki.

19 Naizvozvo anoreva seizvi Ishe Jehovha: Neupenyu hwangu, zvirokwazvo mhiko yangu yaakashoora, nesungano yangu yaakavhuna, iyo ndichaiunza pamusoro wake.

20 Zvino ndichawaridza mumbure wangu pamusoro pake, uye achatorwa mumusungo wangu, zvino ndichamuuisa kuBhabhironi, uye ndichamutonga ipapo nekuda kwechitadzo chake chaakanditadzira.

21 Nevanotiza vake vose nemapoka ake ose vachawa nemunondo; uye vanosara vachapararira kumhepo dzose; zvino muchaziva kuti ini Jehovha ndataura.

22 Anoreva seizvi Ishe Jehovha: Iniwo ndichatora pamusoro wemusidhari murefusa, ndigoumisa, ndichaguririra kubva pamusoro pematavi awo madiki, nyoro, zvino ini ndichasima pamusoro pegomo refu rakakwirira;

23 pagomo renhongonya yaIsraeri ndichausima; uye uchabudisa matavi, ndokubereka chibereko, ndokuva musidhari wakanakisisa; uye pasi pawo pachagara shiri dzose dzebapiro rimwe nerimwe; mumumvuri wematavi awo dzichagara.

24 Zvino miti yose yesango ichaziva kuti ini Jehovha ndakaderedza muti murefu, ndakasimudzira muti mupfupi, ndakaomesa muti munyoro, ndokuita muti wakaoma ubuke; ini Jehovha ndakataura, uye ndakaita.