Kusatendeka kweJerusarema

16Shoko raJehovha rakasvikazve kwandiri richiti:

2 Mwanakomana wemunhu, zivisa Jerusarema zvinyangadzo zvaro.

3 Zvino uti: Anoreva seizvi Ishe Jehovha kuJerusarema: Chizvarigo chako nekwawakaberekwa kwakabva kunyika yevaKenani; baba vako vaiva muAmori, namai vako muHiti.

4 Uye chizvarigo chako pazuva rawakaberekwa rukuvhute rwako haruna kugurwa, uye hauna kushambidzwa mumvura kuti unake, uye hauna kutongokwizwa nemunyu, uye hauna kutongoputirwa nemachira.

5 Hakuna ziso rakakunzwira tsitsi, kukuitira chimwe chezvinhu izvi, kukunzwira ngoni; asi wakarasirwa pachiso chesango, pakusemwa kwehunhu hwako pazuva rawakaberekwa.

6 Pandakapfuura nepauri ndokukuona uchipfakanyika muropa rako, zvino ndikati kwauri uri muropa rako: Rarama! Hongu ndakati kwauri uri muropa rako: Rarama!

7 Ndakakupamhidzirisa kwazvo sebukira rekusango, uye wakawedzera ndokukura, uye wakasvika paukomba hwakaisvonaka; mazamu akaumbika, nevhudzi rako rakakura, asi waiva usina kupfeka uye wakashama.

8 Pandakapfuura nepauri, ndokukuona, zvino tarira, nguva yako yaiva nguva yerudo, zvino ndakawarira mupendero wenguvo yangu pamusoro pako ndokufukidza kushama kwako, hongu, ndakakupikira, ndokupinda musungano newe, anoreva Ishe Jehovha, iwe ndokuva wangu.

9 Zvino ndakakushambidza nemvura, uye ndakasuka ropa rako kwauri, uye ndakakuzodza nemafuta.

10 Ndakakufukidzawo nezvakarukwa, ndikakupfekedza shangu dzematehwe ezvikumba, ndakasunga chiuno chako nerineni yakapfava, ndakakufukidza nesiriki.

11 Ndakakushongedza neukomba, uye ndakaisa zvishongo zvemaoko pazvanza zvako, neruketani pamutsipa wako.

12 Zvino ndakaisa chindori pamhino yako, nezvishongo panzeve dzako, nekorona yakanaka pamusoro wako.

13 Saizvozvo wakashongedzwa negoridhe nesirivha, uye zvipfeko zvako irineni yakapfava nesiriki nezvakarukwa; wakadya upfu hwakatsetseka neuchi nemafuta; uye waiva wakanakisisa kwazvo, uye wakabudirira kuita ushe.

14 Zvino mbiri yako yakabudira pakati pevahedheni nekuda kwekunaka kwako, nokuti kwaiva kwakaperera kubudikidza nekweumambo hwangu hwandaiva ndaisa pamusoro pako, anoreva Ishe Jehovha.

15 Asi wakavimba nerunako rwako, ndokufeva nekuda kwezita rako, ndokudurura ufeve hwako kuna ani nani anopfuura, hukava hwake.

16 Zvino wakatora pazvipfeko zvako, ndokuzviitira nzvimbo dzakakwirira nemavara akasiyana-siyana, ndokufeva pamusoro pazvo; zvakadaro hazvingauyi uye hazvingaitiki.

17 Wakatorawo zvishongo zvako zvakanaka pagoridhe rangu nepasirivha yangu, zvandaiva ndakupa, ukazviitira zvifananidzo zvevarume, ukaita ufeve nazvo.

18 Wakatorawo zvipfeko zvako zvakarukwa, ndokuzvifukidza, ndokuisa mafuta angu nezvipfungaidzo zvinonhuhwira zvangu pamberi pazvo.

19 Zvekudya zvanguwo zvandakakupa, upfu hwakatsetseka nemafuta neuchi zvandakakufunda nazvo, wakazviisawo pamberi pazvo, zvive hwema hunonhuhwira; zvikava saizvozvo, anoreva Ishe Jehovha.

20 Uye wakatora vanakomana vako nevanasikana vako, vawakandiberekera, wakabaira ivo kuti vadyiwe. Chinhu chidiki here cheufeve ukuru hwako,

21 zvawakazouraya vana vangu, ukavapa kuti uvapfuudzise nemumoto nekuda kwavo?

22 Nepamanyara ako ose neufeve hwako hauna kurangarira mazuva eudiki hwako, pawaiva usina kupfeka uye wakashama, uchipfakanyika muropa rako.

23 Zvino zvakaitika shure kwekuipa kwako kose (nhamo, nhamo kwauri, anoreva Ishe Jehovha),

24 wakazvivakirawo mudunduru, wakazviitira nzvimbo yakakwirira panzira imwe neimwe yemumusha.

25 Kumusoro umwe neumwe wenzira wakavaka nzvimbo yako yakakwirira, wakaita kunaka kwako kusemese, ukazarura tsoka dzako kuna ani nani anopfuura, wakawanza ufeve hwako.

26 Wakafevawo nevaEgipita vavakidzani vako, vakuru panyama, ukawanza ufeve hwako, kuti unditsamwise.

27 Naizvozvo tarira, ndakatandavadzira ruoko rwangu pamusoro pako, uye ndakatapudza mugove wako wakatarwa, ndikakuisa muchido chevanokuvenga, vakunda vevaFirisitia vakanyadziswa nenzira yako yakaipa.

28 Wakafevawo nevaAsiriya, nokuti waiva usingagutsikani; zvirokwazvo, wakafeva navo, zvakadarowo hauna kugutsikana.

29 Wakawanzawo kufeva kwako panyika yevashambadziri, kusvika kuKaradhiya; asi zvakadaro pane izvi hauna kugutsikana.

30 Moyo wako unoshaiwa simba zvakadii, anoreva Ishe Jehovha, pakuita kwako zvinhu izvi zvose, basa remukadzi anofeva, anotonga;

31 pakuvaka kwako mudunduru wako pamusoro wenzira imwe neimwe, nekuita nzvimbo yako yakakwirira panzira imwe neimwe yemumusha; asi hauna kuita sechifeve, zvawakashora muripo wechifeve.

32 Haiwa mukadzi anofeva, anotora vatorwa pachinzvimbo chemurume wake!

33 Vanopa chipo kuzvifeve zvose, asi iwe unopa zvipo zvako kuvadikanwi vako vose, uchivatenga kuti vauye kwauri kubva kumativi ose nekuda kweufeve ukuru hwako.

34 Naizvozvo mauri mune kupesana nevanhukadzi paufeve kwako ukuru, zvakusina anokutevera kunofeva; uye zvaunopa muripo wechifeve iwe asi hakuna muripo wechifeve unopiwa kwauri; naizvozvo uri wakapesana.

35 Naizvozvo iwe chifeve, inzwa shoko raJehovha.

36 Anoreva seizvi Ishe Jehovha: Nokuti ufeve hwako hwakadururwa, uye kushama kwako kwakafukurwa nekufeva kwako kuzhinji nevadikanwi vako, uye nekuda kwezvifananidzo zvose zvezvinonyangadza zvako, uye zvichienderana neropa revana vako, rawakazvipa;

37 naizvozvo tarira, ndichaunganidza vadikanwi vako vose, vawaifara navo, nevose vawaida, pamwe nevose vawaivenga; uye ndichavaunganidza vakakukomba kukurwisa, uye ndichafukura kushama kwako kwavari, kuti vaone kushama kwako kose.

38 Zvino ndichakutonga semitongo yevanhukadzi vanofeva nevateuri veropa; uye ndichakupa ropa rekupfuta negodo.

39 Zvino ndichakupa muruoko rwavo; uye vachaputsa mudunduru wako, nekukoromora nzvimbo dzako dzakakwirira; uye vachakukurura nguvo dzako, nekutora zvishongo zvako zvakanaka; uye vachakusiya wakashama usina kupfeka.

40 Vachakukwidzirawo chaunga kukurwisa, uye vachakutaka nemabwe, nekukubvoora neminondo yavo.

41 Zvino vachapisa dzimba dzako nemoto, nekuisa mitongo pamusoro pako pamberi pemeso evanhukadzi vazhinji, zvino ndichakuregesa ubve pakuva chifeve, uye hauchazopizve muripo wechifeve.

42 Saizvozvo ndichazorodza kupfuta kwangu kwauri, uye godo rangu richabva kwauri, uye ndichanyarara ndikasazokutsamwirazve.

43 Nekuda kwekuti hauna kurangarira mazuva eudiki hwako, asi wakanditsamwisa nezvose izvi, naizvozvowo, tarira, ini ndichauyisa nzira yako pamusoro pemusoro, anoreva Ishe Jehovha; uye haungazoiti zvakashata izvi pamusoro pezvinyangadzo zvako zvose.

44 Tarira, umwe neumwe anoshandisa tsumo achashandisa tsumo pamusoro pako achiti: Samai, wakadaro mwanasikana wake.

45 Iwe uri mwanasikana wamai vako, vakasema murume wavo nevana vavo; iwe uri vakoma vemadzikoma ako, vakasema varume vavo nevana vavo; mai vako vaiva muHiti, nababa vako muAmori.

46 Uye vakoma vako ndiSamariya, iye nevakunda vake vanogara kuruoko rwako rweruboshwe, nemunin'ina wako mudiki kwauri anogara kuruoko rwako rwerudyi, ndiSodhoma nevakunda vake.

47 Zvakadaro hauna kufamba nenzira dzavo, kana kuita zvichitevera zvinyangadzo zvavo; sechinhu chidiki chinosemesa, iwe wakaora kuvapfuura panzira dzako dzose.

48 Neupenyu hwangu, anoreva Ishe Jehovha, zvirokwazvo Sodhoma munin'ina wako haana kuita, iye nevakunda vake, sezvawakaita, iwe nevakunda vako.

49 Tarira, ichi chitadzo chemunin'ina wako Sodhoma: Kuzvikudza, kugutisa zvekudya, nekushaya hanya kwekunyarara, zvaiva maari nemuvakunda vake, asi haana kusimbisa ruoko rwemurombo neanoshaiwa.

50 Zvino vaizvikudza, ndokuita chinyangadzo pamberi pangu; naizvozvo ndakavabvisa sekuona kwangu.

51 Uye Samariya harina kutadza nehafu yezvivi zvako; asi iwe wakawanza zvinyangadzo zvako kupfuura ivo, uye wakaruramisira vanin'ina vako muzvinyangadzo zvako zvose zvawakaita.

52 Iwewo takura chinyadzo chako, iwe wakapembedza vanin'ina vako, nokuti zvivi zvako zvawakaita zvinonyangadza kupfuura ivo; vakarurama kukupfuura; hongu, iwe nyadziswawo, ugotakura chinyadzo chako, pakuti wakaruramisira vanin'ina vako.

53 Pandichadzosa vatapwa vavo, vatapwa veSodhoma nevakunda varo, nevatapwa veSamariya nevakunda vayo, ipapo ndichadzosa vatapwa vevatapwa vako pakati pavo;

54 kuti utakure chinyadzo chako, uye unyadziswe pane zvose zvawakaita, pakuvanyaradza kwako.

55 Vanin'ina vako Sodhoma nevakunda vake pavachadzokera pachimiro chavo chekutanga, naSamariya nevakunda vake pavachadzokera pachimiro chavo chekutanga, ipapo iwe nevakunda vako muchadzokera kuchimiro chenyu chekutanga.

56 Nokuti munin'ina wako Sodhoma haana kuva pamuromo pako kuva shoko pazuva rekuzvikudza kwako.

57 Uipi hwako hwusati hwafukurwa, sepanguva yekushorwa kwevakunda veSiriya nevose vakavakomberedza, vakunda vevaFirisitia, vanokuzvidza kumativi ose.

58 Iwe wakatakura mano ako akaipa nezvinyangadzo zvako, anoreva Jehovha.

59 Nokuti anoreva seizvi Ishe Jehovha: Ndichakuitirazve sekuita kwako, wakashoora mhiko pakuputsa sungano.

60 Zvakadaro ndicharangarira sungano yangu newe pamazuva eudiki hwako, uye ndichasimbisa kwauri sungano yekusingaperi.

61 Ipapo ucharangarira nzira dzako ugonyara, pauchagamuchira vanasikana vamai vako vakuru kwauri nevadiki kwauri; nokuti ndichakupa ivo kuva vakunda, asi kwete nesungano yako.

62 Zvino ini ndichasimbisa sungano yangu newe; zvino uchaziva kuti ini ndiri Jehovha;

63 kuti urangarire ugonyara, usazoshamisa muromo wakozve nekuda kwenyadzi dzako, kana ndakuitira chiyananiso pazvose zvawakaita, anoreva Ishe Jehovha.