3Zvinonzi: Kana murume achirasa mukadzi wake, iye akabva kwaari ndokuva weumwe murume, iye achadzokazve kwaari here? Nyika iyo haingasvibiswi kwazvo here? Asi iwe wakafeva nevadikanwi vazhinji; zvakadaro dzokazve kwandiri, anoreva Jehovha.

2 Simudzira meso ako kumidunduru uone; ndepapi pausina kurarwa newe? Panzira wakavagarira, semuArabhiya parenje; uye wasvibisa nyika neufeve hwako ukuru uye neuipi hwako.

3 Naizvozvo mvura inopfunha yakanyimwa, nemvura yekupedzisira yaiva isipo; zvino wakava nehuma yechifeve, wakaramba kunyadziswa.

4 Kubva ikozvino haungachemi kwandiri here: Baba vangu, muri shamwari yeudiki hwangu?

5 Iye achachengeta hasha dzake nekusingaperi here? Achachengetedza kusvika pakupedzisira here? Tarira, iye wakataura, wakaita zvinhu zvakaipa, ukabudirira.

Jehovha anodana vanhu vake kuti vadzokere kwaari

6 Jehovha wakatizve kwandiri nemazuva aJosiya mambo: Waona here Israeri anodzokera shure zvaakaita? Iye wakaenda kugomo rimwe nerimwe rakakwirira, nekusvika pasi pemuti umwe neumwe mutema, ndokufevapo.

7 Zvino ndakati pashure aita zvinhu zvose izvi: Dzokera kwandiri; asi haana kudzokera. Nehanzvadzi yake isakatendeka Judha wakaona.

8 Zvino ndakaona, ipapo nekuda kwezvikonzero zvose Israeri wekudzokera shure zvaakaitira ufeve, ndakamudzinga ndikamupa rugwaro rwake rwekurambana, kuti hanzvadzi yavo isakatendeka, Judha, haana kutya, asi naiye wakafamba ndokunofeva.

9 Zvino zvakaitika nekuda kwekusakoshesa kwekufeva kwake kuti wakasvibisa nyika, wakapombora nemabwe nematanda.

10 Zvakadarowo pane zvose izvi, hanzvadzi yavo isakatendeka, Judha, haana kudzokera kwandiri nemoyo wake wose, asi nekunyengera, anoreva Jehovha.

11 Zvino Jehovha wakati kwandiri: Israeri wekudzokera shure wakazvishaisa mhosva kukunda Judha wekusatendeka.

12 Enda unodanidzira mashoko awa kumaodzanyemba, uti: Dzokai, Israeri wekudzokera shure, anoreva Jehovha. Handingawisiri hasha dzangu pamusoro pako, nokuti ndine nyasha, anoreva Jehovha. Handingachengeti hasha dzangu nekusingaperi.

13 Koga ziva chitadzo chako kuti wakatadzira Mwari wako, wakaparadzira nzira dzako kuvatorwa pasi pemuti umwe neumwe mutema, uye hauna kuteerera kushoko rangu, anoreva Jehovha.

14 Dzokai, vana vekudzokera shure, anoreva Jehovha, nokuti ini ndakazviwanisa kwamuri, uye ndichakutorai, umwe paguta, uye vaviri pamhuri, uye ndichakuisai kuZiyoni.

15 Zvino ndichakupai vafudzi zvichienderana nemoyo wangu; uye vachakufudzai neruzivo nekunzwisisa.

16 Zvino zvichaitika kana mawanda mabereka zvibereko panyika, nemazuva iwawo, anoreva Jehovha, havangatizve: Areka yesungano yaJehovha; zvino haingasviki pamoyo, uye havangairangariri, uye havangaishanyiri, zvisazoitikazve.

17 Panguva iyo vachatumidza Jerusarema chigaro cheushe chaJehovha; uye marudzi ose achaunganidzirwa kwariri, kuJerusarema, nekuda kwezita raJehovha; uye havachazoteveri ukukutu hwemoyo yavo yakashata.

18 Nemazuva iwawo imba yaJudha ichafamba pamwe neimba yaIsraeri; uye vachabuda pamwe chete kubva kunyika yekumaodzanyemba, vauye kunyika yandakapa madzibaba enyu ive nhaka yavo.

19 Asi ini ndakati: Ndichakuisa sei pakati pevana, ndikupe nyika inoyevedza, nhaka yakanaka kwazvo yemarudzi? Zvino ndakati: Uchanditi: Baba vangu; uye usingatsauki pakunditevera.

20 Zvirokwazvo, semukadzi asina kuvimbika kumurume wake, saizvozvo hamuna kuvimbika kwandiri, imwi imba yaIsraeri, anoreva Jehovha.

21 Inzwi rinonzwika kumidunduru, kuchema, kunyengetera kwevana vaIsraeri; nokuti vakaminamisa nzira yavo, vakakanganwa Jehovha Mwari wavo.

22 Dzokai, imwi vana vekudzokera shure; ndichapodza kudzokera shure kwenyu kuzhinji. Tarirai, isu tauya kwamuri, nokuti muri Jehovha Mwari wedu.

23 Zvirokwazvo, hazvina maturo zvinobva kumidunduru, kuwanda kwemakomo. Zvirokwazvo ruponeso rwaIsraeri rwuri kuna Jehovha Mwari wedu.

24 Nokuti chinyangadzo chapedza basa remadzibaba edu kubva paudiki hwedu, makwai avo nemombe dzavo, vanakomana vavo nevanasikana vavo.

25 Tinorara pasi muchinyadzo chedu, nenyadzi dzedu dzakatifukidza, nokuti takatadzira Jehovha Mwari wedu, isu nemadzibaba edu, kubva paudiki hwedu kusvika nhasi; uye hatina kuteerera shoko raJehovha Mwari wedu.