Jeremiya anodanwa naJehovha

1 Mashoko aJeremiya, mwanakomana waHirikiya wevapristi vaiva paAnatoti panyika yaBhenjamini.

2 Kwaari kwakasvika shoko raJehovha pamazuva aJosiya mwanakomana waAmoni, mambo waJudha, mugore regumi nematatu rekutonga kwake.

3 Rakasvikawo mumazuva aJehoyakimu mwanakomana waJosiya, mambo waJudha, kusvika pakupera kwegore regumi nerimwe raZedhekia mwanakomana waJosiya, mambo waJudha, kusvika pakutapwa kweJerusarema mumwedzi wechishanu.

4 Zvino shoko raJehovha rakasvika kwandiri, richiti:

5 Ndisati ndakuumba mudumbu ndakakuziva, uye usati wabuda muchizvaro ndakakusanangura; ndakakugadza kuva muporofita kumarudzi.

6 Zvino ndakati: Haiwa, Ishe Jehovha, tarirai, handizivi kutaura, nokuti ndiri mwana.

7 Asi Jehovha wakati kwandiri: Usati: Ndiri mwana; nokuti uchaenda kuna ani nani wandichakutuma, nechipi nechipi chandichakuraira uchataura.

8 Usatya nekuda kwezviso zvavo, nokuti ndinewe kuti ndikununure, anoreva Jehovha.

9 Zvino Jehovha wakatandavadza ruoko rwake, ndokubata muromo wangu; Jehovha ndokuti kwandiri: Tarira, ndaisa mashoko angu mumuromo mako.

10 Ona, ndakugadza nhasi pamusoro pemarudzi, nepamusoro peushe uzhinji, kuudzura, nekukoromora, nekuparadza, nekuwisira pasi, kuvaka, nekudzvara.

Chiratidzo chedavi remuarimondi negate rinovira

11 Zvino shoko raJehovha rakasvika kwandiri richiti: Jeremiya, unoonei? Ndikati: Ndinoona davi remuarimondi.

12 Ipapo Jehovha akati kwandiri: Waona zvakanaka; nokuti ndinorinda shoko rangu kuti ndiriite.

13 Zvino shoko raJehovha rakasvika kwandiri rwechipiri, richiti: Unoonei? Ndikati: Ndinoona gate rinovira, uye chiso charo chiri kumaodzanyemba.

14 Ipapo Jehovha wakati kwandiri: Chakaipa chichazarurirwa kubva kumaodzanyemba pavagari vose vepanyika.

15 Nokuti tarira, ndichadana mhuri dzose dzeushe uzhinji hwekumaodzanyemba, anoreva Jehovha, uye dzichasvika, dzigogadza umwe neumwe chigaro chake cheushe pakupinda pamasuwo eJerusarema, nekurwisana nemasvingo aro kumativi ose, nekurwisana nemaguta ose ekwaJudha.

16 Uye ndichareva mitongo yangu pamusoro pavo pane zvakaipa zvavo zvose, zvavakandisiira, vakapisira vamwe vamwari zvipfungaidzo zvinonhuhwira, vakashumira mabasa emaoko avo.

17 Zvino iwe, zvisunge chiuno chako, usimuke, utaure kwavari zvose zvandakakuraira; usavhunduswa nekuda kwezviso zvavo, zvimwe ndikuvhunduse pamberi pavo.

18 Nokuti tarira, ini ndakuita nhasi uve guta rakachengetedzeka, uye uve mbiru yedare, uye uve masvingo endarira, kurwisa nyika yose, kurwisa madzimambo aJudha, kurwisa machinda awo, kurwisa vapristi vavo, nekurwisa vanhu vepanyika.

19 Zvino vachakurwisa asi havangakukundi, nokuti ndinewe, anoreva Jehovha, kukununura.