52Muka, muka, pfeka simba rako, iwe Ziyoni; pfeka nguvo dzako dzakaisvonaka, iwe Jerusarema, guta dzvene; nokuti kubva ikozvino hakungapinda mukati mako asina kudzingiswa neasina kuchena.

2 Zvizunze kubva muguruva; simuka, ugare pasi, iwe Jerusarema; zvisunungure pazvisungo zvemutsipa wako, iwe mukunda wakatapwa weZiyoni.

3 Nokuti anoreva seizvi Jehovha: Makatengeswa pasina; zvino muchadzikunurwa pasina mari.

4 Nokuti anoreva seizvi Ishe Jehovha: Vanhu vangu vakaburukira Egipita nenguva yekare kunogarako sevatorwa; zvino muAsiriya wakavamanikidza pasina.

5 Zvino ikozvino, ndinei pano, anoreva Jehovha, kuti vanhu vangu vanotorerwa pasina; vanotonga pamusoro pavo vanovaungudzisa, anoreva Jehovha; uye zita rangu rinoramba richinyombwa zuva rose.

6 Naizvozvo vanhu vangu vachaziva zita rangu; naizvozvo nezuva iro vachaziva kuti ndini ndinotaura; tarira, ndini.

7 Dzakanaka sei pamusoro pemakomo tsoka dzeanouya nemashoko akanaka, anoparidza rugare, anouya nemashoko akanaka ezvakanaka, anonzwisa ruponeso, anoti kuZiyoni: Mwari wako anotonga!

8 Inzwi renharirire dzako! Vachasimudza inzwi, vachaimba zvikuru pamwe chete; nokuti vachaona ziso neziso, Jehovha paachadzosa Ziyoni.

9 Pururudzai nemufaro, imbai pamwe chete, imwi matongo eJerusarema, nokuti Jehovha wakanyaradza vanhu vake, wakadzikinura Jerusarema.

10 Jehovha akafukura ruoko rweutsvene hwake pameso pemarudzi ose; uye migumo yose yenyika ichaona ruponeso rwaMwari wedu.

11 Ibvai, ibvai, budai ipapo, musabata chinhu chine tsvina; budai pakati paro; ivai vakachena, imwi munotakura midziyo yaJehovha.

12 Nokuti hamungabudi muchikurumidza, uye hamungaendi muchitiza; nokuti Jehovha achafamba pamberi penyu; uye Mwari waIsraeri achava muvhumbamiri mumashure.

13 Tarirai, muranda wangu achaita neuchenjeri; achakwiridzwa, nekusimudzwa, nekukwirira kwazvo.

14 Sezvo vazhinji vakashamiswa nemwi, kuonekwa kwake kwakakuvara zvakadai, kupfuura upi neupi, nechimiro chake kupfuura vanakomana vevanhu.

15 Saizvozvo achasasa marudzi mazhinji; madzimambo achapfumbira muromo wawo pamusoro pake; nokuti zvavasina kurondedzerwa vachazviona, nezvavasina kunzwa vachazvinzwisisa.