Mutoro weTire

23Mutoro weTire. Ungudzai, imwi zvikepe zveTarishishi, nokuti raparadzwa, kuti pasava neimba, kuti kusava nekupinda; kubva kunyika yeKitimi zvakaratidzwa kwavari.

2 Nyararai, imwi vagari vechiwi, vakakuzadza vatengesi veSidhoni vanoyambuka gungwa.

3 Zvino nemumvura zhinji, mbeu yeShihori, goho rerwizi, ndiwo mubairo wavo; uye inzvimbo yemarudzi yekutengeserana.

4 Nyara, iwe Sidhoni, nokuti gungwa rataura, simba regungwa, richiti: Handirwadziwi nemimba, uye handibereki vana, uye handireri majaya kana kukurisa mhandara.

5 Sepashoko reEgipita, vacharwadziwa pashoko reTire.

6 Yambukirai kuTarishishi; ungudzai, imwi vagari vechiwi.

7 Iri ndiro guta renyu raifara here, kare kwaro kubva pamazuva ekare? Tsoka dzaro dzicharitakurira kure kunogara semutorwa.

8 Ndiani akapangira Tire zano izvozvo, mugadziki wekorona, vatengesi varo machinda, vashambadziri varo ndevanokudzwa venyika?

9 Jehovha wehondo akazvironga, kusvibisa kuzvikudza kwerukudzo rwose, kuti azvidze vose vanokudzwa venyika.

10 Pfuura nemunyika yako serwizi, iwe mukunda weTarishishi; hakuchine bhanhire.

11 Wakatandavadza ruoko rwake pamusoro pegungwa; wakazungunusa ushe uzhinji; Jehovha wakapa murairo kurwisa Kenani, kuparadza nhare dzayo.

12 Zvino wakati: Hauchazofarizve, mhandara yakamanikidzwa, mukunda weSidhoni; simuka uyambukire kuKitimi; naikoko hakuna zororo kwauri.

13 Tarirai, nyika yevaKaradhiya; rudzi urwu rwaiva rwusipo; vaAsiriya vakaiteyera vaigara mumarenje; vakamisa shongwe dzavo, vakakoromora mizinda yayo; wakaiita dongo.

14 Ungudzai, imwi zvikepe zveTarishishi; nokuti nhare yenyu yaparara.

15 Zvino zvichaitika, nezuva iro, kuti Tire richakanganikwa makore makumi manomwe, zvichienderana nemakore amambo umwe; pakupera kwemakore makumi manomwe Tire richava nechakaita serwiyo rwechifeve.

16 Tora rudimbwa, utenderere guta, chifeve wakanganikwa, ridza zvakanaka, uimbe nziyo zhinji, kuti urangarirwe.

17 Zvino zvakaitika, pakupera kwemakore makumi manomwe, Jehovha achashanyira Tire; zvino richadzokera pakuhaiwa kweufeve hwaro; uye richafeva neushe hwose hwenyika pachiso chepasi.

18 Zvishambadzirwa zvaro nechipo charo zvichava zvitsvene kuna Jehovha; hazvingachengetwi uye hazvingaunganidzwi, nokuti mubairo waro wekushambadzirana uchava wevanogara pamberi paJehovha, kuti vadye vagute, uye vave nezvipfeko zvakanaka.