Shoko raJehovha pamusoro peBhabhironi

13Mutoro weBhabhironi Isaya mwanakomana waAmozi waakaona.

2 Simudzai mureza pagomo riri bani; simudzirai inzwi kwavari; ninirai ruoko, kuti vapinde pamasuwo evanoremekedzwa.

3 Ini ndakaraira vakaitwa vatsvene vangu, ndakadanawo mhare dzangu nekuda kwekutsamwa kwangu, avo vanofara paukuru hwangu.

4 Kutinhira kwechaunga mumakomo, kufanana nevanhu vakawanda, inzwi reruzha rweumambo uzhinji hwemarudzi akaungana: Jehovha wehondo achiongorora uto rehondo.

5 Vanobva kunyika iri kure, kumugumo wematenga, Jehovha pamwe nezvombo zvekutsamwa kwake, kuparadza nyika yose.

6 Ungudzai, nokuti zuva raJehovha rava pedo; richasvika sekuparara kunobva kuna Wemasimbaose.

7 Naizvozvo maoko ose achashaya simba, nemoyo umwe neumwe wemunhu uchanyunguduka.

8 Zvino vachavhunduka; marwadzo nematambudziko zvichavabata; vacharwadziwa semukadzi anorwadziwa nemimba; vachashamisika umwe kune umwe wake; zviso zvavo zviso zvemirazvo yemoto.

9 Tarirai, zuva raJehovha rinouya, rine utsinye, nehasha, nekupisa kwekutsamwa, kuisa nyika ive dongo, nekuparadza vatadzi vayo kubva mairi.

10 Nokuti nyeredzi dzematenga, nemapoka adzo, hadzingapenyesi chiedza chadzo; zuva richasvibiswa pakubuda kwaro; nemwedzi haungapenyesi chiedza chawo.

11 Nokuti ndichatsiva uipi pamusoro penyika, nezvivi zvavo pamusoro pevatadzi; uye ndichagumisa manyawi evanozvikudza, nekuninipisa kuzvikudza kwevanotyisa.

12 Ndichaita murume akoshe kupfuura goridhe rakaisvonaka, uye munhu kupfuura goridhe rakazara reOfiri.

13 Naizvozvo ndichazungunusa matenga, nenyika ichadedera ibve panzvimbo yayo, pakutsamwa kwaJehovha wehondo, uye pazuva rekupisa kwekutsamwa kwake.

14 Zvino zvichava semhara inovhimiwa, uye semakwai asina anoaunganidza; vachatendeukira umwe neumwe kuvanhu vekwake, vatizire umwe neumwe kunyika yake.

15 Umwe neumwe achawanikwa achabaiwa; uye umwe neumwe achabatwa achawa nemunondo.

16 Nevacheche vavo vachapwanyiwa pamberi pemeso avo; dzimba dzavo dzichapambiwa; uye vakadzi vavo vachararwa.

17 Tarirai, ndichavamutsira vaMedhi, vasingakudzi sirivha, negoridhe havarifariri.

18 Asi uta hwavo huchapwanyira pasi majaya; uye havangavi netsitsi nechibereko chechizvaro; ziso ravo harina tsitsi nevana.

19 Zvino Bhabhironi, mbiri paumambo uzhinji, kunaka kwekuzvikudza kwevaKaradhiya, richava sekuparadzwa naMwari kweSodhoma neGomora.

20 Haringatongogarwi kusvika rinhi narinhi, uye haringagarwi kuzera nezera; nemuArabhiya haangadziki tende rakemo, nevafudzi havangavatisipo mapoka.

21 Asi zvikara zvesango zvichararamo; uye dzimba dzavo dzichazara nezvinorira; nevakunda vemhou vachagaramo; nemweya yakaipa yakaita sembudzi ichatambapo.

22 Zvino mapere achadavirana mumatongo avo, nemabukanana pamizinda ine mufaro. Zvino nguva yaro yava pedo kusvika, nemazuva aro haanganonoswi.