Zvinotambudza vanhu

4Zvino ini ndakadzoka ndokuona kumanikidza kose kukuru kunoitwa pasi pezuva; zvino tarira misodzi yevanomanikidzwa, uye havana munyaradzi; uye paruoko rwevamanikidzi vavo pane simba; asi havana munyaradzi.

2 Naizvozvo ndakarumbidza vakafa, vakatofa, kupfuura vapenyu vachiri vapenyu.

3 Hongu, asati avapo uri nani pavaviri vavo, pakuti haana kuona basa rakaipa rakaitwa pasi pezuva.

4 Zvino ini ndakaona kubata kose, nemibairo yose yebasa, kuti igodo remunhu kubva kune wekwake. Izviwo hazvina maturo uye kutambudzika kwemoyo.

5 Benzi rinofungatira maoko aro, richidya nyama yaro.

6 Ruoko rwuzere murunyararo rwunopfuura maoko maviri azere mukubata nekutambudzika kwemoyo.

7 Zvino ini ndakadzoka, ndikaona kushaya maturo pasi pezuva.

8 Kune umwe uye hakuna wepiri, kunyange haana mwanakomana kana munin'ina, asi kubata kwake kose hakuna mugumo. Uye ziso rake harigutswi nefuma, uye haati: Ndinobatira ani, ndichishaisa mweya weupenyu wangu zvakanaka? Izviwo hazvina maturo, hongu, kutambudzika kunoshungurudza.

9 Vaviri vari nani pane umwe, pakuti vane mubairo wakanaka mukubata kwavo.

10 Nokuti kana vakawa, umwe achasimudza shamwari yake; asi ane nhamo uyo ari oga kana akawa; nokuti hapana wepiri kumumutsa.

11 Uye kana vaviri vachirara pamwe, vane rudziira; asi umwe angava nerudziira sei?

12 Zvino kana umwe akamukunda ari oga, vaviri vachamira kumurwisa; uye rwonzi rwemutatu harungakurumidzi kudamburwa.

13 Jaya murombo rakachenjera riri nani pana mambo mutana benzi, asingachazivi kutsiurwa.

14 Nokuti anobuda mutirongo kuti azova mambo; kunyangewo paushe hwake akaberekwa ari murombo.

15 Ndakaona vapenyu vose vanofamba pasi pezuva, pamwe nemukomana wechipiri achamira pachinzvimbo chake.

16 Hakuna mugumo kuvanhu vose, kune vose vakavatangira; kunyange vanozotevera havangamufariri. Zvirokwazvo, izviwo hazvina maturo nekutambudzika kwemoyo.