26Semagada echando muzhizha, uye semvura mukukohwa, saizvozvo rukudzo harwufaniri benzi.

2 Seshiri pakumbeya mbeya, senyenganyenga pakubhururuka, saizvozvo kutuka pasina mhosva hakungasviki.

3 Tyava ndeyebhiza, tomu nderembongoro, uye shamhu ndeyemusana wemapenzi.

4 Usapindura benzi neupenzi hwaro, zvimwe newe ufanane naro.

5 Pindura benzi neupenzi hwaro, zvimwe rive rakachenjera pameso aro.

6 Anotuma mashoko neruoko rwebenzi, anogura tsoka, anonwa utsinye.

7 Makumbo echirema anongoremberera; chakadaro chirevo mumuromo wemapenzi.

8 Semunhu anosungira ibwe pachifuramabwe, wakadaro anopa rukudzo kubenzi.

9 Seminzwa unokwira muruoko rwechidhakwa, chakadaro chirevo mumuromo wemapenzi.

10 Mukuru muumbi wezvose, anopa mubairo benzi, uye anopa mubairo vapfuuri.

11 Seimbwa inodzokera kumarutsi ayo, rakadaro benzi rinopamhidza upenzi hwaro.

12 Unoona here munhu wakachenjera pameso ake? Kune tarisiro kubenzi kupfuura iye.

13 Ane usimbe anoti: Kune shumba panzira; shumba iri munzira dzemumusha.

14 Gonhi rinotendereka pahinji raro; saizvozvo simbe panhovo yayo.

15 Simbe inoviga ruoko rwayo mundiro; ine usimbe kurudzosera kumuromo wayo.

16 Simbe yakachenjera pameso ayo kupfuura vanomwe vanopindura nenjere.

17 Mupfuuri anozvitsamwisa pagakava risiri rake anobata nzeve dzeimbwa.

18 Semupengo anokanda huni dzinobarika, miseve, nerufu;

19 wakadaro munhu anonyengera wekwake ndokuti: Handiiti jee here?

20 Kana pasina huni moto unodzima; uye pasina mucheri gakava rinoguma.

21 Semazimbe pamaratya anopfuta, nehuni pamoto, wakadaro munhu wemakakava kupfutidza rukave.

22 Mashoko emucheri akaita semisuva inomedzwa nekukurumidza; uye iyo inoburukira mukati-kati medumbu.

23 Miromo inopisa nemoyo wakaipa marara esirivha akafukidza hari.

24 Anovenga anozviitisa nemiromo yake, asi anoisa kunyengera mukati make.

25 Kana achiita inzwi rake rive netsitsi, usavimba naye, nokuti zvinyangadzo zvinomwe zviri mumoyo make.

26 Ruvengo rwake rwunofukidzwa nekunyengera, uipi hwake huchabudiswa pachena paungano.

27 Anochera gomba achawira mariri; nemukungurusi webwe rinotendeukira kwaari.

28 Rurimi rwenhema runovenga akuvadzwa narwo; uye muromo unobata kumeso unoita kuparadza.