18Anozviparadzanisa anongotsvaka chishuvo; anopazira uchenjeri hwakanaka hwose.

2 Benzi harifari mukunzwisisa, asi kuti moyo waro ufukurwe.

3 Kana wakaipa achiuya, kuzvidza kunouyawo; pamwe chete nezvinonyadzisa, kushora kunouyawo.

4 Mashoko emuromo wemunhu imvura yakadzika; chitubu chenjere rukova rwunoyerera.

5 Hazvina kunaka kugamuchira chiso chewakaipa, kutsausa wakarurama pamutongo.

6 Miromo yebenzi inopinda pagakava; nemuromo waro unodana shamhu zhinji.

7 Muromo webenzi kuparadzwa kwaro; uye miromo yaro musungo wemweya weupenyu waro.

8 Mashoko emucheri akaita semisuva inomedzwa nekukurumidza; iyo ndoburukira mukati-kati medumbu.

9 Neari simbe pabasa rake, iye munin'ina wenyanzvi yeuparadzi.

10 Zita raJehovha ishongwe yakasimba; wakarurama achamhanyira kwairi agomiswa akachengeteka.

11 Fuma yemufumi iguta rake rakasimba, uye serusvingo rurefu pakufunga kwake.

12 Moyo wemunhu anozvikudza kuparadzwa kusati kwavapo; uye kuzvininipisa kunotangira rukudzo.

13 Anopindura nyaya asati anzwa, upenzi nechinyadzo kwaari.

14 Mweya wemunhu uchatsigira kurwara kwake; asi ndiani angatakura mweya wakaputsika?

15 Moyo weanonzwisisa unowana ruzivo; uye nzeve yewakachenjera inotsvaka ruzivo.

16 Chipo chemunhu chinomuzarurira pakafaranuka, uye chinomutungamirira pamberi pevakuru.

17 Anotanga pamhosva yake anoonekwa akarurama; asi wekwake anosvika ndokumuferefeta.

18 Mujenya unopedza magakava, uye unoparadzanisa pakati pevane simba.

19 Hama yatadzirwa inopfuura guta rakasimba; uye makakava akaita sechipfigiso cheimba yamambo.

20 Dumbu remunhu rinogutswa nezvibereko zvemuromo wake; achaguta nezvinowanikwa zvemiromo yake.

21 Rufu neupenyu zviri muruoko rwerurimi; uye vanoruda vachadya chibereko charwo.

22 Wawana mukadzi wawana chakanaka, uye wagamuchira nyasha kuna Jehovha.

23 Murombo anotaura mikumbiro, asi mufumi anopindura zvinhu zvehasha.

24 Munhu ane shamwari zhinji achaparara; asi kune mudikanwi anonamatira kupfuura hama.