16Kuronga-ronga kwemoyo ndekwemunhu; asi mhinduro yerurimi inobva kuna Jehovha.

2 Nzira dzose dzemunhu anoti dzakachena pameso pake; asi Jehovha anoyera mweya.

3 Kungurusira mabasa ako ose kuna Jehovha, zvino zvawakaronga zvichasimbiswa.

4 Jehovha wakazviitira zvose, newakaipawo pazuva rakaipa.

5 Umwe neumwe anozvikudza pamoyo chinyangadzo kuna Jehovha, ruoko kuruoko, haangaregwi asina kurangwa.

6 Munyasha nechokwadi chivi chinofukidzwa; uye nekutya Jehovha munhu anobva pachakaipa.

7 Kana nzira dzemunhu dzichifadza Jehovha, anomuyananisira kunyange nevavengi vake.

8 Zvishoma pamwe nekururama zviri nani pane uwandu hwezvakawanikwa nekusarurama.

9 Moyo wemunhu unoronga nzira yake, asi Jehovha anosimbisa nhanho yake.

10 Chiga chamambo chiri mumiromo yamambo; muromo wake haungatsauki pamutongo.

11 Chiyero nechienzaniso chakarurama ndezvaJehovha; matombo ose ekuyera ehombodo ibasa rake.

12 Chinyangadzo kumadzimambo kuita zvakaipa; nokuti chigaro cheushe chinosimbiswa nekururama.

13 Miromo yakarurama mufaro wemadzimambo; uye anoda uyo anotaura zvinhu zvakarurama.

14 Kutsamwa kwamambo inhume dzerufu; asi munhu wakachenjera anokunyaradza.

15 Pachiedza chechiso chamambo pane upenyu; nenyasha yake segore remvura yekupedzisira.

16 Kuwana uchenjeri kwakanaka sei kupfuurisa goridhe; nekuwana kunzwisisa kune vakasarudzwa kupfuura sirivha.

17 Mugwagwa mukuru wevakarurama kutendeuka kubva pachakaipa; anochenjerera nzira yake anochengetedza mweya weupenyu wake.

18 Kuzvikudza kunotangira kuparadzwa; uye mweya wemanyawi unotangira kuwa.

19 Zviri nani kuninipa pamweya pamwe nevepasi pakugovana zvakapambiwa pamwe nevanozvikudza.

20 Anobata nyaya neuchenjeri anowana zvakanaka; uye anovimba naJehovha ane mafarwa.

21 Wakachenjera pamoyo achanzi wakangwara; uye kutapira kwemiromo kunowedzera dzidzo.

22 Kunzwisisa kwevaridzi vako chitubu cheupenyu; asi kuraira kwemapenzi upenzi.

23 Moyo wewakachenjera unoitisa muromo wake uchenjere; uye anowedzera kudzidza pamiromo yake.

24 Mashoko anonaka mazinga euchi, anotapira kumweya weupenyu, uye upenyu kupfupa.

25 Pane nzira inoonekwa yakarurama pamberi pemunhu; asi kuguma kwayo inzira dzerufu.

26 Nzara yemushingairi inozvishingairira, nokuti muromo wake unomukurudzira.

27 Munhu asina maturo anochera zvakaipa; uye pamiromo yake pane semoto unopisa.

28 Munhu akatsauka anokusha gakava; uye mucheri anoparadzanisa shamwari dzepedo.

29 Munhu anomanikidza anokwezva wekwake; uye achimufambisa nenzira isina kunaka.

30 Anotsinzina meso ake kuronga zvinhu zvakatsauka; anorumana miromo yake anopedza chakashata.

31 Imvi dzemusoro ikorona yerunako; dzinowanikwa munzira yekururama.

32 Anononoka kutsamwa ari nani pane ane simba; neanotonga pamusoro pemweya wake pane anotapa guta.

33 Mujenya unokandirwa kumakumbo, asi zvinotemwa zvawo zvose zvinobva kuna Jehovha.