12Anoda kurairirwa anoda ruzivo; asi anovenga kutsiurwa ibenzi.

2 Wakanaka anowana nyasha kuna Jehovha; asi anopa mhosva munhu wemazano akaipa.

3 Munhu haangamiswi neuipi; asi mudzi wevakarurama haungazununguswi.

4 Mukadzi anoshingairira zvakanaka ikorona yemurume wake; asi anonyadzisa wakaita sezvakaora pamapfupa ake.

5 Mirangariro yevakarurama yakarurama; mazano evakaipa unyengeri.

6 Mashoko evakaipa ndeekuvandira ropa; asi muromo wevakarurama uchavanunura.

7 Vakaipa vachaparadzwa, havachipo; asi imba yevakarurama ichamira.

8 Munhu acharumbidzwa zvichienderana neuchenjeri hwake; asi wakatsauka pamoyo achava wakazvidzwa.

9 Anozvidzwa ane muranda ari nani pane anozvikudza uye asina zvekudya.

10 Wakarurama anochenjerera upenyu hwechipfuwo chake; asi tsitsi dzevakaipa utsinye.

11 Anorima munda wake achaguta nezvekudya; asi anotevera zvisina maturo anoshaiwa pfungwa.

12 Wakaipa anoshuva zvakapambiwa zvevakaipa; asi mudzi wevakaipa unotunga.

13 Pakudarika kwemiromo pane musungo wewakaipa; asi wakarurama achabuda panhamo.

14 Munhu achagutiswa nezvakanaka nechibereko chemuromo; uye mubairo wemaoko emunhu uchadzoserwa kwaari.

15 Nzira yebenzi yakarurama pameso aro; asi anoteerera zano wakachenjera.

16 Benzi, pazuva iroro kutsamwa kwaro kunozikanwa; asi wakachenjera anovanza kunyadziswa.

17 Anofema chokwadi anozivisa kutendeka; asi mupupuri wenhema zhinji unyengeri.

18 Pane anotaura nekusarangarira wakaita sekubaya kukuru kwemunondo; asi rurimi rwevakachenjera kuporesa.

19 Muromo wechokwadi uchamiswa nekusingaperi; asi rurimi rwenhema nderwechinguvana.

20 Unyengeri huri mumoyo yevanoronga zvakaipa; asi mufaro kune vapi vemazano erugare.

21 Chakaipa chimwe hachingawiri vakarurama; asi vakaipa vazere uipi.

22 Miromo yenhema chinyangadzo kuna Jehovha; asi vanoita chokwadi ndivo mufaro wake.

23 Munhu wakachenjera anovanza ruzivo; asi moyo yemapenzi inoparidza upenzi.

24 Ruoko rwevanoshingaira rwunotonga; asi simbe dzichava dzechibharo.

25 Kushungurudzika mumoyo memunhu kunoukotamisa; asi shoko rakanaka rinoufadza.

26 Wakarurama muongorori wewekwake; asi nzira yevakaipa inovatsausa.

27 Simbe haigochi mhuka yayavhima; asi fuma yemunhu anoshingaira inokosha.

28 Mugwara rekururama mune upenyu; uye mugwara renzira hamuna rufu.