Uchenjeri hunorumbidzwa

8Ko uchenjeri hahudanidziri here? Uye njere hadzibudisi inzwi radzo here?

2 Humire panhongonya yenzvimbo dzakakwirira, panzira, pakati pedzinzira.

3 Hunodanidzira parutivi rwemasuwo, pamuromo peguta, pakupinda pamikova, huchiti:

4 Kwamuri, varume, ndinodana; uye inzwi rangu riri kuvanakomana vevanhu.

5 Nzwisisai uchenjeri, imwi vasina ruzivo; nemwi mapenzi, nzwisisai nemoyo.

6 Inzwai, nokuti ndichataura zvinhu zveumambo; uye kuzarurwa kwemiromo yangu kuchava kururama kukuru.

7 Nokuti muromo wangu unotaura chokwadi; uye uipi chinhu chinonyangadza pamiromo yangu.

8 Mashoko ose emuromo wangu ari mukururama; hakuna chinhu chakakombama kana chisakarurama maari.

9 Ose akachena kune ane njere; nekururama kune avo vakawana ruzivo.

10 Gamuchirai kudzidzisa kwangu, uye kwete sirivha; neruzivo kupfuura goridhe rakasarudzwa.

11 Nokuti uchenjeri huri nani pane zvibwe zvakanaka; uye zvose zvinoshuviwa hazvingaenzaniswi nahwo.

12 Ini uchenjeri ndinogara pamwe nekunzwisisa, uye ndinowana ruzivo nemazano.

13 Kutya Jehovha kuvenga uipi; ndinovenga kuzvikudza, nemanyawi, nenzira yakaipa, nemuromo wekutsauka kukuru.

14 Zano nderangu, neuchenjeri hwechokwadi; ndiri kunzwisisa, ndine simba.

15 Neni madzimambo anotonga, uye machinda anomisa kururama.

16 Neni madzishe anotonga, nevakuru, vatongi vose vepanyika.

17 Ini ndinoda vanondida; uye vanonditsvaka kwazvo vachandiwana.

18 Fuma nerukudzo zvineni, fuma inoenderera uye kururama.

19 Chibereko changu chiri nani pane goridhe, iro goridhe rakaisvonaka, nezvinowanikwa zvangu kupfuura sirivha yakasarudzwa.

20 Ndinofamba munzira yekururama, mukati memakwara ekururamisa,

21 kugarisa vadikanwa vangu nhaka yefuma, hongu, ndizadze zvivigiro zvefuma yavo.

22 Jehovha wakandiita wake, kutanga kwenzira yake, pamberi pemabasa ake, kubva ipapo.

23 Ndakagadzwa kubva rinhi narinhi, kubva pakutanga, kubva kumashure kwenyika.

24 Udziku ukuru husati hwavapo ndaiva ndaberekwa, pasati pava nezvitubu zvinorema nemvura.

25 Makomo asati adzvarwa, mikwidza isati yavapo, ndaiva ndaberekwa.

26 Asati aita nyika, nemapani, nekutanga kweguruva zhinji renyika.

27 Paaigadzira matenga ndaiva ndiripo, paaimisa chadenga pamusoro pechiso cheudziku;

28 paakamisa makore kumusoro, paakasimbisa zvitubu zveudziku;

29 paakamisira gungwa muganhu waro, kuti mvura isadarika murairo wake, paakagadza nheyo dzenyika;

30 ipapo ndaiva pedo naye, anorerwa naye; ndaiva mufaro mukuru zuva nezuva, ndichitamba pamberi pake nguva dzose;

31 ndichitamba padunhu renyika yake, uye mufaro wangu mukuru uri kuvanakomana vevanhu.

32 Zvino ikozvino, imwi vanakomana, teererai kwandiri; hongu, vakaropafadzwa vanochengetedza nzira dzangu.

33 Inzwai kuraira, muve vakachenjera, uye musaramba.

34 Wakaropafadzwa munhu anondinzwa, kuti arinde pamasuwo angu zuva nezuva, kumirira pamagwatidziro emukova angu.

35 Nokuti andiwana, awana upenyu, achagamuchira nyasha kuna Jehovha.

36 Asi anonditadzira, anokanganisira mweya weupenyu wake; vose vanondivenga vanoda rufu.