Mwari haanzwi kuchema kwevanhu nekuda kwekusatenda kwavo

35Zvino Erihu wakapindura ndokuti:

2 Unofunga kuti izvi zvakanaka here? Wati: Kururama kwangu kunopfuura kwaMwari?

3 Nokuti wati: Zvinobatsirei kwauri? Zvinondibatsirei kupfuura chivi changu?

4 Ini ndichakupindura, neshamwari dzako pamwe newe.

5 Tarira kumatenga, ugoona, uye utarise makore, akakwirira kukupfuura.

6 Kana ukatadza, unomuitirei? Kana zvitadzo zvako zvikapamhidzirwa, unoitei kwaari?

7 Kana wakarurama, unomupei? Kana anogamuchirei muruoko rwako?

8 Uipi hwako huri mukubata munhu wakaita sewe, nekururama kwako kuri mukubata mwanakomana wemunhu.

9 Nekuda kweuwandu hwemanikidzo vanovachemedza; vanochema nekuda kweruoko rwevane simba.

10 Asi hakuna anoti: Aripi Mwari muiti wangu, anopa nziyo neusiku?

11 Anotidzidzisa kupfuura mhuka dzenyika, nekutichejedza kupfuura shiri dzematenga?

12 Ipapo vanochema, asi haapinduri, nekuda kwekuzvikudza kwevakaipa.

13 Zvirokwazvo Mwari haanganzwi zvisina maturo, uye Wemasimbaose haangavi nehanya nazvo.

14 Hongu, kunyange ukati: Haumuoni; mutongo uri pamberi pake; naizvozvo unomumirira.

15 Asi ikozvino, nokuti kutsamwa kwake hakuna kuranga, naiye haangazivururi here kuzvikudza?

16 Naizvozvo Jobho anoshamisa muromo wake pasina; pasina ruzivo anowanza mashoko.