Jobho anorangarira mazuva ekufara kwake

29Zvino Jobho wakapfuura kusimudzira dimikira rake ndokuti:

2 Haiwa, dai ndaiva sepamwedzi yekare, sepamazuva Mwari akandichengetedza.

3 Pakuvhenekesa kwake mwenje wake pamusoro wangu; nechiedza chake ndakafamba murima.

4 Sezvandaiva pamazuva ekuibva kwangu, zano raMwari paraiva pamusoro petende rangu.

5 Wemasimbaose paaiva achiri neni, nevana vangu vakandipoteredza.

6 Pandaisuka matsimba angu neruomba, uye ibwe richindidururira nzizi dzemafuta.

7 Pandaibuda kuenda kusuwo nemuguta, ndakagadzira chigaro changu padare.

8 Majaya akandiona ndokuvanda, nevatana vakasimuka vakamira.

9 Machinda akarega kutaura, ndokuisa ruoko pamuromo wawo.

10 Inzwi revakuru rakavanda, nerurimi rwavo rwakanamatira kumusoro kwemukanwa wavo.

11 Nzeve payainzwa, ndokunditi ndakaropafadzwa; neziso rakaona rikandipupurira.

12 Nokuti ndainunura murombo anochema, nenherera, neasina mubatsiri.

13 Ropafadzo yewotandadza yakauya pamusoro pangu, uye ndakaita moyo wechirikadzi uimbe nemufaro.

14 Ndapfeka kururama, naiko kwakandifukidza; kururamiswa kwangu kwakava senguvo nekorona.

15 Ndaiva meso kumapofu, uye ndaiva tsoka kumhetamakumbo.

16 Ndaiva baba kune vanoshaiwa; nenyaya yandisingazivi ndakainzvera.

17 Ndakavhuna mazino ewakaipa, nekukanda chaakajimba kubva pameno ake.

18 Zvino ndakati: Ndichapera nedendere rangu, ndipamhidzire mazuva sejecha.

19 Mudzi wangu wakatanda kusvika kumvura, nedova rinorara usiku padavi rangu.

20 Rukudzo rwangu rwutsva mandiri, neuta hwangu muruoko rwangu hwavandudzika.

21 Kwandiri vakateerera, ndokumirira, ndokunyarara pazano rangu.

22 Shure kweshoko rangu havana kudzokorora, nenhau yangu yakadonhera pamusoro pavo.

23 Uye vakandimirira semvura, uye muromo wavo vakaushamisira kwazvo mvura yekupedzisira.

24 Pandakavaseka, havana kutenda; nechiedza chechiso changu havana kuwisira pasi.

25 Ndakavasarudzira nzira, ndikagara pamusoro, ndokugara samambo pakati pehondo yakarongwa, seanonyaradza vanochema.