7Zvino Erisha wakati: Inzwai shoko raJehovha: Ndizvo zvinoreva Jehovha: Nenguva inenge ino mangwana, chiyero cheupfu hwakatsetseka chichava cheshekeri, nezviyero zviviri zvebhari zveshekeri, pasuwo reSamariya.

2 Zvino ishe mambo waaiva akasendama paruoko rwake wakapindura munhu waMwari ndokuti: Tarirai, dai Jehovha akaita mahwindo kumatenga, chinhu ichi chingaitika here? Iye ndokuti: Tarira, uchaona nemeso ako, asi haungadyi zvazvo.

3 Zvino kwaiva nevarume vana vemaperembudzi panopinda pamukova; ndokuti umwe kune umwe: Tinogarirei pano kusvika tafa?

4 Kana tikati: Tichapinda muguta, zvino nzara iri muguta, uye tichafiramo; uye kana tikagara pano, tichafawo. Naizvozvo ikozvino hendei tinowira mumusasa wevaSiriya; kana vakatirega tichirarama, tararama; uye kana vakatiuraya, tichangofa.

5 Zvino vakasimuka mambakwedza kuenda kumusasa waSiriya. Vakati vasvika kumucheto kwemusasa waSiriya, zvino tarira, kwaiva kusina munhuko.

6 Nokuti Ishe waiva anzwisa hondo yevaSiriya ruzha rwengoro, ruzha rwemabhiza, ruzha rwehondo huru; ndokuti umwe kune umwe: Tarira, mambo waIsraeri wakatihaira* madzimambo evaHiti nemadzimambo evaEgipita kuzotirwisa.

7 Naizvozvo vakasimuka ndokutiza mambakwedza, ndokusiya matende avo nemabhiza avo nembongoro dzavo, musasa sezvauri, ndokutiza neupenyu hwavo.

8 Vemaperembudzi ava pavakasvika pamucheto wemusasa, vakapinda mune rimwe tende, ndokudya ndokunwa, ndokutakura kubvapo sirivha negoridhe nenguvo, ndokuenda ndokuviga, ndokudzokazve, ndokupinda mune rimwe tende, ndokutakura kubvapo, ndokuenda, ndokuviga.

9 Zvino vakati umwe kune umwe: Hatisi kuita zvakanaka; zuva rino izuva reshoko rakanaka, asi isu takazvinyararira. Kana tikamirira kusvika pachiedza chemangwanani, murango uchatiwana. Zvino ikozvino, uyai ngatiende tiudze imba yamambo.

10 Zvino vakasvika ndokudanidzira kumutariri wesuwo reguta, ndokuvaudza vachiti: Takasvika kumusasa wevaSiriya, zvino tarirai, kwanga kusina munhuko kana inzwi remunhu, asi mabhiza akasungirwa, nembongoro dzakasungirwa, nematende sezvaari.

11 Zvino wakadana vachengeti vesuwo, ivo ndokuudza imba yamambo mukati.

12 Zvino mambo wakasimuka usiku ndokuti kuvaranda vake: Ndichakuudzai zvino VaSiriya zvavakatiitira. Vanoziva kuti tine nzara; naizvozvo vabuda pamusasa ndokuzvivanza musango vachiti: Kana vabuda muguta, tichavabata vari vapenyu tigopinda muguta.

13 Zvino umwe wevaranda vake wakapindura ndokuti: Regai vatore mashanu emabhiza asara, asara mukati meguta. Tarirai, vakaita sechaunga chose chaIsraeri chakasara mariri; tarirai vakaita sechaunga chose chaIsraeri chakapedzwa; ngatitume tione.

14 Zvino vakatora mabhiza maviri engoro; mambo ndokutuma shure kwehondo yevaAsiriya achiti: Endai, muone.

15 Zvino vakavatevera kusvika kuna Joridhani, zvino tarira, nzira yose yakazara nenguvo nemidziyo VaSiriya zvavaiva varasa pakukurumidza kwavo. Nhume ndokudzokera ndokuudza mambo.

16 Zvino vanhu vakabuda, ndokupamba musasa wevaSiriya. Naizvozvo chiyero cheupfu hwakatsetseka chakava cheshekeri, nezviyero zviviri zvebhari zveshekeri, zvichienderana neshoko raJehovha.

17 Zvino mambo wakaisa ishe waiva amire paruoko rwake pasuwo; vanhu ndokutsika pamusoro pake pasuwo, iye ndokufa, munhu waMwari sezvaaiva ataura, iye wakataura, pakuburukira kwamambo kwaari.

18 Zvino zvakaitika munhu waMwari sezvaaiva ataura kuna mambo achiti: Zviyero zviviri zvebhari neshekeri, nechiyero cheupfu hwakatsetseka neshekeri panguva inenge ino mangwana zvichava pasuwo reSamariya.

19 Zvino ishe wakapindura munhu waMwari ndokuti: Tarira, dai Jehovha akaita mahwindo kumatenga, zvichava sechinhu ichi here? Iye ndokuti: Tarira, uchazviona nemeso ako, asi haungazvidyi.

20 Zvino zvakava saizvozvo kwaari; nokuti vanhu vakamutsikira pasi pasuwo, ndokufa.