Kurwa kwaSamusoni nevaFirisitia

15Zvino zvakaitika shure kwemazuva, pamazuva ekukohwa gorosi, kuti Samusoni wakanoshanyira mukadzi wake ane mbudzana yembudzi, ndokuti: Ngandipinde kumukadzi wangu mumba. Asi baba vake havana kumutendera kupinda.

2 Baba vake ndokuti: Zvirokwazvo ndakataura kuti wava kumuvenga zvekumuvenga; naizvozvo ndakamupa kushamwari yako. Munin'ina wake haana kunaka kukunda iye here? Ngaave hake wako pachinzvimbo chake.

3 Zvino Samusoni wakati kwavari: Ikozvino handichina mhosva kuvaFirisitia kana ndikavaitira zvakaipa.

4 Zvino Samusoni wakaenda ndokunobata makava mazana matatu, ndokutora mwenje, ndokuafuratidzanisa muswe wakatarisana nemuswe, ndokuisa mwenje umwe pakati pemiswe miviri pakati nepakati.

5 Zvino atungidza moto pamwenje, wakaaregedza akapinda muzviyo zvakamira zvevaFirisitia; ndokupisa kubva kumatutu kusvika kuzviyo zvimire, neminda yemizambiringa nemiorivhi.

6 Zvino vaFirisitia vakati: Ndiani waita izvi? Vakati: Samusoni, mukwasha wemuTimuna, nokuti wakatora mukadzi wake ndokumupa kushamwari yake. Zvino vaFirisitia vakakwira, ndokupisa mukadzi nababa vake nemoto.

7 Samusoni ndokuti kwavari: Kana maita saizvozvo, zvakadaro ndichatsiva kwamuri, uye pashure peizvo ndicharega.

8 Zvino wakavarova, chidya nechiuno, kuuraya kukuru; ndokuburuka ndokunogara pabako redombo Etami.

9 Zvino vaFirisitia vakakwira ndokudzika matende paJudha, ndokupararira muRehi.

10 Zvino varume vaJudha vakati: Makwirirei kuzorwa nesu? Ivo ndokuti: Takwira kuzosunga Samusoni, kuti timuitire sezvaakatiitira.

11 Zvino varume vaJudha zvuru zvitatu vakaburukira kubako redombo Etami, ndokuti kuna Samusoni: Hauzivi kuti vaFirisitia vatongi pamusoro pedu here? Chii ichi chawatiitira? Iye ndokuti kwavari: Sezvavakaita kwandiri, ndaita saizvozvo kwavari.

12 Zvino vakati kwaari: Taburukira kukusunga kuti tikupe muruoko rwevaFirisitia. Samusoni ndokuti kwavari: Pikai kwandiri kuti imwi hamungawiri pandiri.

13 Zvino vakataura kwaari, vachiti: Kwete; asi tichakusunga zvekukusunga ndokukupa muruoko rwavo, asi zvirokwazvo hatingakuurayi. Zvino vakamusunga netambo mbiri itsva, ndokumukwidza kubva padombo.

14 Paakasvika Rehi, vaFirisitia vakamupururudzira. Zvino Mweya waJehovha wakauya nesimba pamusoro pake; tambo dzaiva pamaoko ake ndokuva sedzakafanana nefirakisi* yakatsva nemoto, uye zvisungo zvake zvikanyauka kubva pazvanza zvake.

15 Akawana rushaya rutsva rwembongoro, ndokutandavadza ruoko rwake, ndokurutora, ndokurova narwo varume churu.

16 Samusoni ndokuti: Nerushaya rwembongoro, murwi, mirwi miviri, nerushaya rwembongoro ndakarova varume churu.

17 Zvino zvakaitika apedza kutaura, kuti wakakanda rushaya kubva muruoko rwake, ndokutumidza nzvimbo iyo Ramati-Rehi.

18 Zvino wakava nenyota kwazvo, ndokuchema kuna Jehovha, ndokuti: Imwi makapa kusunungurwa kukuru uku neruoko rwemuranda wenyu; zvino ikozvino ndichafa nenyota, ndikawira muruoko rwevasina kudzingiswa here?

19 Asi Mwari wakapamura mukaha paRehi, mvura ikabudapo; wakati anwa, mweya wake ukadzoka, akaponazve; naizvozvo wakatumidza zita racho Eni-Hakori, riri paRehi kusvika nhasi.

20 Iye akatonga Israeri makore makumi maviri pamazuva evaFirisitia.