Miganhu yeKenani

34Zvino Jehovha wakataura kuna Mozisi achiti:

2 Raira vana vaIsraeri ugoti kwavari: Pamunosvika munyika yeKenani, iyi ichava nyika inowira kwamuri kuva nhaka, nyika yeKenani nemiganhu yayo.

3 Zvino rutivi rwenyu rwechamhembe rwuchava kubva murenje reZini, kumativi eEdhomu. Zvino uchava muganhu wenyu wekuchamhembe kubva pamuganhu wegungwa remunyu nechekumabvazuva.

4 Muganhu wenyu uchashanduka kubva kuchamhembe kumukwidza weAkirabhimu, ndokupfuurira kuZini; nekubuda kwawo kwaiva kubva kuchamhembe kweKadheshi-Bharineya; zvino uchapfuura kuHazari-Adhari, ugopfuurira kuAzimoni.

5 Zvino muganhu uchashanduka kubva paAzimoni kuenda kurukova rweEgipita, uye kubuda kwawo kuchava mugungwa.

6 Maererano nemuganhu wekumavirazuva, gungwa guru richava muganhu wenyu; ndiro richava muganhu wenyu kumavirazuva.

7 Zvino uyu uchava muganhu wenyu wekumaodzanyemba: Kubva pagungwa guru muchazvitarira gomo reHori;

8 kubva pagomo reHori muchatara unoenda pakupinda paHamati; uye kubuda kwemuganhu kuende paZedhadhi.

9 Zvino muganhu uchabuda kuenda kuZifuroni, uye kubuda kwawo kuchava paHazari-Enani; uyu uchava muganhu wenyu wekumaodzanyemba.

10 Zvino muchatara muganhu wenyu wekumabvazuva kubva paHazari-Enani kusvika paShefami.

11 Zvino muganhu uchaburuka kubva paShefami kusvika paRibhira kumabvazuva kweAini; zvino muganhu uburuke usvike kumucheto wegungwa reKinereti kumabvazuva.

12 Zvino muganhu uchaburukira kuJoridhani, nekubuda kwayo kuchava pagungwa remunyu. Iyi ichava nyika yenyu nemiganhu yayo yakaipoteredza.

13 Zvino Mozisi wakaraira vana vaIsraeri achiti: Iyi inyika yamuchagara nhaka nemujenya, Jehovha yaakaraira kupa kumarudzi mapfumbamwe nehafu yerudzi.

14 Nokuti rudzi rwevana vevaRubheni zvichienderana neimba yemadzibaba avo, nerudzi rwevana vevaGadhi zvichienderana neimba yemadzibaba avo vakagamuchira; nehafu yerudzi rwaManase vakagamuchira nhaka yavo.

15 Marudzi maviri nehafu yerudzi akagamuchira nhaka yawo nechekuno kwaJoridhani, paJeriko nechekumabvazuva kwakananga kunobuda nako zuva.

16 Zvino Jehovha wakataura kuna Mozisi achiti:

17 Awa mazita evarume vachakugoverai nhaka yenyika: Eriazari mupristi naJoshua mwanakomana waNuni.

18 Zvino muchatora muchinda umwe kurudzi rumwe nerumwe kugovera nhaka yenyika.

19 Zvino awa mazita evarume ava: Kurudzi rwaJudha, Karebhu mwanakomana waJefune.

20 Nekurudzi rwevana vaSimioni, Shemueri mwanakomana waAmihudhi.

21 Kurudzi rwaBhenjamini, Eridhadhi mwanakomana waKisironi.

22 Nekurudzi rwevana vaDhani, muchinda Bhuki mwanakomana waJogiri.

23 Kuvana vaJosefa, kurudzi rwevana vaManase, muchinda Hanieri mwanakomana waEfodhi.

24 Nekurudzi rwevana vaEfuremu, muchinda Kemueri mwanakomana waShifitani.

25 Nekurudzi rwevana vaZebhuruni, muchinda Erizafani mwanakomana waPanaki.

26 Nekurudzi rwevana vaIsasikari, muchinda Paritieri mwanakomana waAzani.

27 Nekurudzi rwevana vaAsheri, muchinda Ahihudhi mwanakomana waSheromi.

28 Nekurudzi rwevana vaNafutari, muchinda Pedhaheri mwanakomana waAmihudhi.

29 Ava ndivo Jehovha vaakaraira kutsaurira vana vaIsraeri nhaka munyika yeKenani.