29Zvino mumwedzi wechinomwe nerekutanga remwedzi muchava neungano yakadanwa tsvene; hamungaiti chero basa revaranda; izuva rekuridza hwamanda kwamuri.

2 Zvino muchagadzira chipo chinopiswa, chive hwema hunonhuhwira kuna Jehovha: Nzombe diki mhuru yemombe imwe, gondohwe rimwe, makwayana manomwe egore rimwe asina gwapa;

3 nechipo chazvo chechidyiwa cheupfu hwakatsetseka hwakakanyiwa nemafuta, zvegumi zvitatu panzombe diki, zvegumi zviviri pagondohwe,

4 nechegumi chimwe pagwayana rimwe, pamakwayana manomwe;

5 nembudzana imwe yembudzi, chipo chezvivi, kukuitirai chiyananiso;

6 kusingaverengwi chipo chinopiswa chemwedzi, nechipo chacho chechidyiwa, nechipo chinopiswa chenguva dzose, nechipo chacho chechidyiwa, nezvipo zvazvo zvechinwiwa, zvichienderana netsika yazvo, chive hwema hunonhuhwira, chipo chemoto kuna Jehovha.

7 Zvino nezuva regumi remwedzi uyu wechinomwe muchava neungano yakadanwa tsvene; uye mucharwadzisa mweya yeupenyu yenyu; musaita chero basa.

8 Asi muchapa chipo chinopiswa kuna Jehovha, chive hwema hunonhuhwira: Nzombe diki mhuru yemombe imwe, gondohwe rimwe, makwayana manomwe egore rimwe; zvive zvisina chipomerwa kwamuri;

9 nechipo chazvo chechidyiwa cheupfu hwakatsetseka hwakakanyiwa nemafuta; zvegumi zvitatu panzombe diki, zvegumi zviviri pagondohwe rimwe;

10 icho neicho chegumi pagwayana rimwe, pamakwayana manomwe;

11 mbudzana imwe yembudzi, chipo chezvivi; kusingaverengwi chipo chezvivi chekuyananisa, nechipo chinopiswa chenguva dzose, nechipo chacho chechidyiwa, nezvipo zvazvo zvezvinwiwa.

12 Zvino nezuva regumi nemashanu remwedzi wechinomwe muchava neungano yakadanwa tsvene; musaita chero basa revaranda; uye muchachengetedzera Jehovha mutambo mazuva manomwe.

13 Zvino muchapa chipo chinopiswa, chipo chemoto chehwema hunonhuhwira kuna Jehovha, nzombe diki mhuru dzemombe gumi nenhatu, makondohwe maviri, makwayana gumi nemana egore rimwe; zvichava zvisina chazvingapomerwa;

14 nechipo chazvo chechidyiwa cheupfu hwakatsetseka hwakakanyiwa nemafuta; zvegumi zvitatu panzombe diki imwe, panzombe diki gumi nenhatu; zvegumi zviviri pagondohwe rimwe, pamakondohwe maviri;

15 neichi neichi chegumi pagwayana rimwe, pamakwayana gumi nemana;

16 nembudzana imwe yembudzi, chipo chezvivi; kusingaverengwi chipo chinopiswa chenguva dzose, chipo chacho chechidyiwa, nechipo chacho chechinwiwa.

17 Zvino nezuva repiri: Nzombe diki mhuru dzemombe gumi nembiri, makondohwe maviri, makwayana gumi nemana egore rimwe asina chaangapomerwa,

18 nechipo chazvo chechidyiwa nezvipo zvazvo zvechinwiwa zvenzombe diki, zvemakondohwe, nezvemakwayana, zvinoenderana neuwandu hwazvo setsika yazvo;

19 nembudzana imwe yembudzi, chipo chezvivi; kusingaverengwi chipo chinopiswa chenguva dzose, nechipo chacho chechidyiwa, nezvipo zvazvo zvechinwiwa.

20 Uye nezuva retatu, nzombe diki gumi neimwe, makondohwe maviri, makwayana gumi nemana egore rimwe asina chaangapomerwa,

21 nechipo chazvo chechidyiwa, nezvipo zvazvo zvechinwiwa, panzombe diki, pamakondohwe, nepamakwayana, zvichienderana neuwandu hwazvo, setsika yazvo;

22 nenhongo imwe, chipo chezvivi, kusingaverengwi chipo chinopiswa chenguva dzose, nechipo chacho chechidyiwa, nechipo chacho chechinwiwa.

23 Uye nezuva rechina, nzombe diki gumi, makondohwe maviri, makwayana gumi nemana egore rimwe asina chaangapomerwa;

24 chipo chazvo chechidyiwa, nezvipo zvazvo zvechinwiwa, panzombe diki, pamakondohwe, nepamakwayana, zvichienderana neuwandu hwazvo, setsika yazvo;

25 nembudzana imwe yembudzi, chipo chezvivi, kusingaverengwi chipo chinopiswa chenguva dzose, chipo chacho chechidyiwa, nechipo chacho chechinwiwa.

26 Uye nezuva reshanu, nzombe diki pfumbamwe, makondohwe maviri, makwayana gumi nemana egore rimwe asina chaangapomerwa;

27 nechipo chazvo chechidyiwa, nezvipo zvazvo zvechinwiwa, panzombe diki, pamakondohwe, nepamakwayana, zvichienderana neuwandu hwazvo, setsika yazvo;

28 nenhongo imwe, chipo chezvivi, kusingaverengwi chipo chinopiswa chenguva dzose, nechipo chacho chechidyiwa, nechipo chacho chechinwiwa.

29 Uye nezuva retanhatu, nzombe diki sere, makondohwe maviri, makwayana gumi nemana egore rimwe asina chaangapomerwa,

30 nechipo chazvo chechidyiwa, nezvipo zvazvo zvechinwiwa, panzombe diki, pamakondohwe, nepamakwayana, zvichienderana neuwandu hwazvo, setsika yazvo;

31 nenhongo imwe, chipo chezvivi, kusingaverengwi chipo chinopiswa chenguva dzose, chipo chacho chechidyiwa, nezvipo zvacho zvechinwiwa.

32 Uye nezuva rechinomwe, nzombe diki nomwe, makondohwe maviri, makwayana gumi nemana egore rimwe asina chaangapomerwa;

33 nechipo chazvo chechidyiwa, nezvipo zvazvo zvechinwiwa, panzombe diki, pamakondohwe, nepamakwayana, zvichienderana neuwandu hwazvo, setsika yazvo;

34 nenhongo imwe, chipo chezvivi, kusingaverengwi chipo chinopiswa chenguva dzose, chipo chacho chechidyiwa, nechipo chacho chechinwiwa.

35 Nezuva rerusere muchava neungano yakadzama; musaita chero basa revaranda.

36 Asi muchapa chipo chinopiswa, chipo chemoto, hwema hunonhuhwira kuna Jehovha: Nzombe imwe diki, gondohwe rimwe, makwayana manomwe egore rimwe asina chipomerwa;

37 chipo chazvo chechidyiwa, nezvipo zvazvo zvechinwiwa, panzombe diki, pagondohwe, nepamakwayana, zvichienderana neuwandu hwazvo, setsika yazvo;

38 nenhongo imwe, chipo chezvivi, kusingaverengwi chipo chinopiswa chenguva dzose, nechipo chacho chechidyiwa, nechipo chacho chechinwiwa.

39 Izvi muchazviitira Jehovha pamitambo yenyu yakatarwa, kusingaverengwi mhiko dzenyu, nezvipo zvenyu zvekuzvidira, pazvipo zvenyu zvinopiswa, nepazvipo zvenyu zvechidyiwa, nepazvipo zvenyu zvechinwiwa, nepazvipo zvenyu zvekuyananisa.

40 Mozisi ndokuudza vana vaIsraeri sezvose Jehovha zvaakaraira Mozisi.