Aroni anotungidza mwenje

8Zvino Jehovha wakataura kuna Mozisi achiti:

2 Taura kuna Aroni, ugoti kwaari: Kana uchitungidza mwenje, mwenje minomwe ichapa chiedza mberi pamberi pechigadziko chemwenje.

3 Aroni ndokuita saizvozvo; mberi pamberi pechigadziko chemwenje wakatungidza mwenje yacho, Jehovha sezvaakaraira Mozisi.

4 Zvino basa iri rechigadziko chemwenje raiva regoridhe rakapfurwa; kusvika pahwaro hwacho kusvika pamaruva acho raiva basa rakapfurwa; semufananidzo Jehovha waakataridza Mozisi, wakachiita saizvozvo chigadziko chemwenje.

Kutsaurwa kwevaRevhi

5 Zvino Jehovha wakataura kuna Mozisi achiti:

6 Bvisa vaRevhi pakati pevana vaIsraeri, uvanatse.

7 Zvino uchavaitira seizvi kuvanatsa: Sasa mvura yekuchenura pamusoro pavo, uye vapfuudze chisvo pamuviri wavo wose, vasuke nguvo dzavo vagozvichenesa.

8 Zvino ngavatore nzombe diki mhuru yemombe, nechipo chayo chechidyiwa, upfu hwakatsetseka hwakakanyiwa nemafuta; utore neimwe nzombe diki mhuru yemombe ive chipo chezvivi.

9 Zvino uchaswededza vaRevhi pamberi petende rekusangana, uye uchaunganidza ungano yose yevana vaIsraeri.

10 Zvino uchaswededza vaRevhi pamberi paJehovha; vana vaIsraeri vagoisa maoko avo pamusoro pevaRevhi.

11 Zvino Aroni achazunguzira vaRevhi vave chipo chinozunguzirwa pamberi paJehovha, kubva kuvana vaIsraeri, kuti vave vangabata basa raJehovha.

12 Zvino vaRevhi vachaisa maoko avo pamisoro yenzombe diki; ugopa imwe ive chipo chezvivi, neimwe ive chipo chinopiswa kuna Jehovha, kuitira vaRevhi chiyananiso.

13 Zvino uchaisa vaRevhi pamberi paAroni nepamberi pevanakomana vake, ugovazunguzira kuva chipo chinozunguzirwa kuna Jehovha.

14 Saizvozvo uchatsaura vaRevhi kubva pakati pevana vaIsraeri, kuti vaRevhi vave vangu.

15 Zvino shure kweizvozvo vaRevhi vachapinda kubata patende rekusangana; uye uchavanatsa nekuvazunguzira vave chipo chinozunguzirwa.

16 Nokuti vakapiwa chose ini pakati pevana vaIsraeri; pachinzvimbo cheicho chinozarura chizvaro chimwe nechimwe, pachinzvimbo chedangwe reumwe neumwe kubva pavana vaIsraeri ndakavatora kwandiri.

17 Nokuti dangwe rose pakati pevana vaIsraeri nderangu, pakati pevanhu nepakati pechipfuwo; nezuva randakarova naro dangwe rimwe nerimwe panyika yeEgipita ndakazviitira vatsvene iwo.

18 Zvino ndakatora vaRevhi panzvimbo yedangwe rose pakati pevana vaIsraeri.

19 Zvino ndakapa vaRevhi sechipo kuna Aroni nekuvanakomana vake, vachibva pakati pevana vaIsraeri, kubata basa revana vaIsraeri mutende rekusangana, nekuitira vana vaIsraeri chiyananiso, kuti kusava nedambudziko pakati pevana vaIsraeri, vana vaIsraeri pavanoswedera kuimba tsvene.

20 Zvino Mozisi naAroni neungano yose yevana vaIsraeri vakaitira vaRevhi zvichienderana nezvose Jehovha zvaakaraira Mozisi pamusoro pevaRevhi; vana vaIsraeri vakavaitira saizvozvo.

21 Zvino vaRevhi vakazvinatsa, ndokusuka nguvo dzavo, Aroni ndokuvazunguzira vakava chipo chinozunguzirwa pamberi paJehovha; Aroni ndokuvaitira chiyananiso kuvanatsa.

22 Zvino shure kweizvozvo vaRevhi vakapinda kubata basa ravo patende rekusangana pamberi paAroni nepamberi pevanakomana vake; Jehovha sezvaakaraira Mozisi pamusoro pevaRevhi, vakavaitira saizvozvo.

23 Zvino Jehovha wakataura kuna Mozisi achiti:

24 Ndizvo zvakanangana nevaRevhi: Kubva pazera remakore makumi maviri nemashanu zvichikwira vagopinda kubata basa pabasa retende rekusangana.

25 Zvino kubva pazera remakore makumi mashanu vachabuda pabasa rebasa, vasava vachiri kubata.

26 Asi vachabatsira hama dzavo patende rekusangana kuchengeta faniro, asi vasabata basa. Uchaita saizvozvo kuvaRevhi pafaniro yavo.