Aritari yekupisira, nedhishi, nechivanze

38Zvino wakaita aritari yechipo chinopiswa nematanda emuakasia; kureba kwayo mbimbi shanu, neupamhi hwayo mbimbi shanu, nhivi ina dzakaenzana, nekukwirira kwayo mbimbi nhatu.

2 Wakaitawo nyanga dzayo pamakona ayo mana; nyanga dzayo dzaibva pairi; ndokuiputira nendarira.

3 Wakaitawo midziyo yose yearitari, hari, nefoshoro, nendiro dzekusasa, zvibaiso zvenyama, nemakango epamoto; midziyo yayo yose akaiita nendarira.

4 Akaitirawo aritari sefa yendarira, basa remumbure, pasi pemucheto wayo, kubva pazasi kusvika pakati payo.

5 Zvino wakaumbira nekunyungudusa zvindori zvina kumicheto mina yesefa yendarira, nzvimbo dzezvibatiso.

6 Wakaitawo zvibatiso zvematanda emuakasia ndokuzviputira nendarira.

7 Zvino wakaisa zvibatiso muzvindori panhivi dzearitari kuitakura nazvo; akaita ive mhango nemapuranga.

8 Akaitawo dhishi rendarira, negumbo raro rendarira, kubva pazvionioni zvevakadzi vanoungana vaiungana pamukova wetende rekusangana.

9 Wakaitawo chivanze; kurutivi rwechamhembe kwakatarisa kuchamhembe kwaiva kune zviremberedzwa zvechivanze zvemucheka wakaisvonaka wakarukwa, mbimbi zana;

10 mbiru dzayo dzaiva makumi maviri, nezvigadziko zvadzo makumi maviri zvendarira; zvikorekedzo zvembiru nezvisungo zvadzo zvaiva zvesirivha.

11 Zvino kurutivi rwemaodzanyemba kwaiva nemakubhiti zana, mbiru dzayo makumi maviri, nezvigadziko zvadzo zvendarira makumi maviri; zvikorekedzo zvembiru nezvisungo zvadzo zvaiva zvesirivha.

12 Zvino kurutivi rwemavirazuva kwaiva nezviremberedzwa zvembimbi makumi mashanu; mbiru dzazvo gumi, nezvigadziko zvadzo gumi; zvikorekedzo zvembiru nezvisungo zvadzo zvaiva zvesirivha.

13 Zvino kurutivi rwemabvazuva kwakatarisa kumabvazuva kwaiva nembimbi makumi mashanu.

14 Zviremberedzwa zvedivi rimwe zvaiva mbimbi gumi neshanu, mbiru dzazvo nhatu, nezvigadziko zvadzo zvitatu.

15 Nekurumwe rutivi rwesuwo rechivanze apa neuko kwaiva nezviremberedzwa mbimbi gumi neshanu, mbiru dzazvo nhatu, nezvigadziko zvadzo zvitatu.

16 Zviremberedzwa zvose zvechivanze zvaipoteredza zvaiva zvemucheka wakaisvonaka wakarukwa.

17 Nezvigadziko zvembiru zvaiva ndarira, zvikorekedzo zvembiru nezvisungo zvadzo zvaiva sirivha; nechifukidzo chemisoro yayo chaiva sirivha; nembiru dzose dzechivanze dzaiva dzakasunganidzwa nesirivha.

18 Nechiremberedzwa chesuwo rechivanze chaiva basa remusoni, zveruvara rwedenga, neruvara rwehute, nezvitsvuku, nemucheka wakaisvonaka wakarukwa; kureba kuri mbimbi makumi maviri, nekukwirira paupamhi mbimbi shanu, zvichienderana nezviremberedzwa zvechivanze.

19 Zvino mbiru dzayo dzaiva ina, nezvigadziko zvadzo zvendarira zvina; zvikorekedzo zvadzo zviri sirivha, nechifukidzo chemisoro yadzo nezvisungo zvadzo zviri sirivha.

20 Nehoko dzose dzetabhenakeri nedzechivanze dzakapoteredza dzaiva ndarira.

Fuma yose yakavakiswa tabhenakeri nayo

21 Ndihwo uwandu hwezvinhu zvetabhenakeri, zvetabhenakeri yechipupuriro, zvakaverengwa maererano nekuraira kwaMozisi, basa revaRevhi neruoko rwaItamari, mwanakomana waAroni mupristi.

22 NaBhezareeri, mwanakomana waUri, mwanakomana waHuri, werudzi rwaJudha, wakaita zvose Jehovha zvaakaraira Mozisi.

23 Zvino pamwe naye paiva naOhoriabhu mwanakomana waAhisamaki, werudzi rwaDhani, mufombori nemubati wakachenjera, nemusoni wezveruvara rwedenga, newezveruvara rwehute, newezvitsvuku, nemucheka wakaisvonaka.

24 Goridhe rose raishandiswa pabasa, pabasa rose repaimba tsvene, iro goridhe rezvipo, raiva matarenda makumi maviri nemapfumbamwe, nemashekeri mazana manomwe nemakumi matatu, zvichienzaniswa neshekeri reimba tsvene.

25 Nesirivha yaivo vaiva vachiverengwa paungano yaiva matarenda zana, nemashekeri churu chimwe nemazana manomwe nemakumi manomwe nemashanu, zvichienzaniswa neshekeri reimba tsvene.

26 Bheka* pamusoro, ndiro hafu yeshekeri, zvichienzaniswa neshekeri reimba tsvene, kune umwe neumwe wakadarika kune vakaverengwa, kubva pamakore makumi maviri zvichikwira, vaiva zvuru mazana matanhatu nezvitatu nemazana mashanu nemakumi mashanu.

27 Uye kwaiva nematarenda esirivha zana ekuumbisa nekunyungudusa zvigadziko zvepaimba tsvene nezvigadziko zvevheiri; zvigadziko zana zvematarenda zana, tarenda rechigadziko.

28 Nemashekeri churu nemazana manomwe nemakumi manomwe nemashanu wakaitira mbiru zvikorekedzo, akaputira misoro yadzo, nekudziitira zvisungo.

29 Nendarira yechipo yaiva matarenda makumi manomwe nemashekeri zvuru zviviri nemazana mana.

30 Nayo wakaita zvigadziko zvemukova wetende rekusangana, nearitari yendarira, nesefa yendarira yayaiva nayo, nemidziyo yose yepaaritari,

31 nezvigadziko zvechivanze chakapoteredza, nezvigadziko zvesuwo rechivanze, nehoko dzose dzetabhenakeri, nehoko dzose dzechivanze chakapoteredza.