Aritari yezvinonhuhwira

30Zvino uchaita aritari yekupisira zvipfungaidzo zvinonhuhwira; uiite nematanda emuakasia.

2 Mbimbi kuve kureba kwayo, nembimbi upamhi hwayo, mativi mana aenzane; uye mbimbi mbiri kuve kukwirira kwayo; nyanga dzayo ngadzibve pairi.

3 Uye uiputire negoridhe rakazara, pamusoro wayo, nenhivi dzayo dzakapoteredza, nenyanga dzayo; uiitirewo mupendero wegoridhe unopoteredza.

4 Uzviitirewo zvindori zviviri zvegoridhe pasi pamupendero wayo; pamapandi ayo maviri, uiite pamativi ayo maviri; uye zvichava nzvimbo dzezvibatiso zvekuitakura nazvo.

5 Uitewo makumbo ematanda emuakasia, ugoaputira negoridhe.

6 Zvino uchaiisa pamberi pevheiri riri paareka yechipupuriro, pamberi pechigaro chengoni chiri pamusoro pechipupuriro, pandichasangana newe.

7 Zvino Aroni achapisa zvipfungaidzo zvinonhuhwira zvinotapira pairi mangwanani oga-oga; kana achiri kugadzira mwenje, achazvipisa.

8 Zvino kana Aroni achitungidza mwenje madekwani, uchazvipisa, zvive zvipfungaidzo zvinonhuhwira rinhi narinhi pamberi paJehovha pamazera enyu.

9 Musapa pamusoro payo zvipfungaidzo zvinonhuhwira zvisingazikanwi, kana chipo chinopiswa, kana chipo chechidyiwa; uye musadururira pamusoro payo chipo chinodururwa.

10 Zvino Aroni achaita chiyananiso panyanga dzayo kamwe pagore, neropa rechipo chezvivi chezviyananiso; kamwe pagore uchaita chiyananiso pairi pamazera enyu; chitsvene chezvitsvene kuna Jehovha.

Chipo chekuyananisa

11 Zvino Jehovha wakataura kuna Mozisi achiti:

12 Paunotora uwandu hwevana vaIsraeri, sekuverengwa kwavo, vachapa umwe neumwe rudzikinuro rwemweya weupenyu wake kuna Jehovha, kana uchivaverenga; kuti parege kuva nekurohwa pakati pavo pakuverengwa kwavo.

13 Vachapa izvi, umwe neumwe anodarika kune vakaverengwa: Hafu yeshekeri zvichienderana neshekeri renzvimbo tsvene (shekeri magera* makumi maviri); hafu yeshekeri chive chipo kuna Jehovha.

14 Umwe neumwe anodarika kune vakaverengwa, kubva pamakore makumi maviri zvichikwira, achapa chipo chaJehovha.

15 Mufumi asapfuudza, nemurombo asatapudza pahafu yeshekeri, kana vachipa chipo chaJehovha kuitira mweya yeupenyu yenyu chiyananiso.

16 Zvino uchatora mari yezviyananiso kuvana vaIsraeri, ugoipa kushumiro yetende rekusangana; kuti chive chirangaridzo kuvana vaIsraeri pamberi paJehovha, kuitira mweya yeupenyu yenyu chiyananiso.

Dhishi rekushambidzira

17 Zvino Jehovha wakataura kuna Mozisi achiti:

18 Uchaitawo dhishi rendarira, nechigadziko charo chendarira, rekugezera; ugoriisa pakati petende rekusangana nearitari, ndokuisamo mvura.

19 Zvino Aroni nevanakomana vake vachashamba maoko avo netsoka dzavo mariri.

20 Pakupinda kwavo mutende rekusangana, vachashamba nemvura, kuti vasafa, kana pakuswedera kwavo kuaritari kunoshumira, kupisira Jehovha chipo chemoto.

21 Saizvozvo vachashamba maoko avo nemakumbo avo, kuti vasafa; zvino chichava kwavari chimiso chekusingaperi, kwaari nekumbeu yake kusvika kumarudzi avo.

Mafuta ekuzodza nawo

22 Jehovha wakataurazve kuna Mozisi achiti:

23 Iwe zvitorerewo zvinonhuhwira zvinokoshesesa, mura inoerera, mashekeri mazana mashanu, nekinamoni hafu yayo inotapira, ndiwo mashekeri mazana maviri nemakumi mashanu, nekaramusi inotapira, mashekeri mazana maviri nemakumi mashanu;

24 nekasia mashekeri mazana mashanu, zvichienderana neshekeri renzvimbo tsvene, nehini yemafuta emaorivhi.

25 Zvino uchaita nazvo mafuta matsvene ekuzodza, musanganiswa wechizodzwa, basa remugadziri wezvinonhuhwira; achava mafuta matsvene ekuzodza.

26 Zvino uchazodza nawo tende rekusangana neareka yechipupuriro,

27 netafura nemidziyo yayo yose, nechigadziko chemwenje nemidziyo yacho, nearitari yezvipfungaidzo zvinonhuhwira,

28 nearitari yechipo chinopiswa nemidziyo yayo yose, nedhishi nechigadziko charo.

29 Zvino uchazviita zvitsvene, kuti zvive zvitsvene zvezvitsvene; chose chinozvigunzva chichava chitsvene.

30 Zvino uchazodza Aroni nevanakomana vake, nekuvatsaura, kuti vandishumire paupristi.

31 Zvino uchataura kuvana vaIsraeri uchiti: Izvi zvichava kwandiri mafuta matsvene ekuzodza pamazera enyu.

32 Ngaarege kudirwa panyama yemunhu; uye zvichienderana nemagadzirirwo awo musaita saiwo; matsvene, achava matsvene kwamuri.

33 Ani nani unosanganisa akafanana nawo, kana anoisa amwe awo pamutorwa, ngaagurwe kubva pavanhu vekwake.

Miti inonhuhwira

34 Zvino Jehovha wakati kuna Mozisi: Zvitorere miti inonhuhwira inotapira: Sitake*, neonika*, negabhano*, miti inonhuhwira inotapira, nezvipfungaidzo zvinonhuhwira zvinotapira; zvichava chikamu nechikamu.

35 Ugozviita zvinonhuhwira, mukanyiwa, basa remukanyi wezvinonhuhwira, zvakarungwa nemunyu, zvakazara, zvitsvene.

36 Zvino uchatswa zvimwe zvazvo kwazvo, ugoisa zvimwe zvazvo pamberi pechipupuriro mutende rekusangana mandichasangana newe; zvive chitsvene chezvitsvene kwamuri.

37 Kana zviri zvinonhuhwira zvamunoita, musazviitira semagadzirirwo azvo; zvichava kwauri zvitsvene kuna Jehovha.

38 Ani nani anoita saizvo, kuti anhuhwire nazvo, ngaagurwe kubva pavanhu vekwake.