Tabhenakeri

26Uchaitawo tabhenakeri nemaketeni* gumi emucheka wakaisvonaka wakarukwa, neruvara rwedenga, neruvara rwehute, nezvitsvuku, nemakerubhi, basa renyanzvi, uchaaita.

2 Kureba kweketeni rimwe mbimbi makumi maviri nesere, neupamhi hweketeni rimwe mbimbi ina; maketeni ose ave ukuru humwe.

3 Maketeni mashanu achabatanidzwa rimwe kune rimwe, uye maketeni mashanu abatanidzwe rimwe kune rimwe.

4 Zvino uchaisa zvishwe zveruvara rwedenga pamupendero werimwe keteni, pamucheto pepakabatanidzwa; saizvozvowo uchaita kumupendero wekupedzisira weketeni wepakabatanidzwa pechipiri.

5 Uchaita zvishwe makumi mashanu paketeni rimwe, nezvishwe makumi mashanu pamupendero weketeni riri pakabatanidzwa perechipiri, zvishwe zvitarisane.

6 Uitewo zvikorekedzo makumi mashanu zvegoridhe, ugobatanidza maketeni, rimwe kune rimwe nezvikorekedzo, zvino ichava tabhenakeri imwe.

7 Zvino uchaita maketeni nemvere dzembudzi hadzi rive tende pamusoro petabhenakeri; uiite nemaketeni gumi nerimwe.

8 Kureba kweketeni rimwe mbimbi makumi matatu, neupamhi hweketeni rimwe mbimbi ina; maketeni ane gumi nerimwe ave ukuru humwe.

9 Zvino uchabatanidza maketeni mashanu ari oga, uye maketeni matanhatu ari oga, ugopeta keteni rechitanhatu kaviri kumucheto kwetende mberi.

10 Zvino uite zvishwe makumi mashanu pamupendero weketeni rimwe rekupedzisira pakabatanidzwa, nezvishwe makumi mashanu pamupendero weketeni rinobatanidza rechipiri.

11 Zvino uchaita zvikorekedzo makumi mashanu zvendarira, ugopinza zvikorekedzo muzvishwe, ubatanidze tende rive rimwe.

12 Zvino zvakasara zvinopfuura maketeni etende, hafu yeketeni rakapfuura, ngariremberere kurutivi rwuri shure kwetabhenakeri.

13 Uye mbimbi kune rumwe rutivi nembimbi kune rumwe rutivi, pazvakasara paurefu hwemaketeni etende, zvicharemberera panhivi dzetabhenakeri kurutivi runo nekurutivi urwo, kuifukidza.

14 Zvino uchaitira tende chifukidzo chematehwe emakondohwe akapendwa zvitsvuku, nechifukidzo chematehwe ezvikumba pamusoro.

15 Zvino uchaitira tabhenakeri mapuranga, matanda emuakasia, akamira.

16 Kureba kwepuranga kuve mbimbi gumi, neupamhi hwepuranga rimwe mbimbi nehafu yembimbi.

17 Puranga rimwe richava nezvibato zviviri, zvakabatanidzwa chimwe kune chimwe; ndizvo zvauchaitira mapuranga ose etabhenakeri.

18 Zvino uchaitira tabhenakeri mapuranga, mapuranga makumi maviri kudivi rekuchamhembe kwakatarisana nechamhembe.

19 Zvino uchaita zvigadziko makumi mana zvesirivha pasi pemapuranga makumi maviri, zvigadziko zviviri pasi pepuranga rimwe pazvibato zvaro zviviri, nezvigadziko zviviri pasi perimwe puranga pazvibato zvaro zviviri;

20 uye mapuranga makumi maviri kurutivi rwechipiri rwetabhenakeri kurutivi rwekumaodzanyemba,

21 nezvigadziko zvawo makumi mana zvesirivha, zvigadziko zviviri pasi pepuranga rimwe, nezvigadziko zviviri pasi perimwe puranga.

22 Uchaitawo mapuranga matanhatu kumativi eshure kwetabhenakeri kumavirazuva.

23 Zvino uchaita mapuranga maviri kumakona etabhenakeri kumativi eshure,

24 uye ave maviri nechenyasi; uye ave akazara kumusoro kwayo akabatanidzwa kuchindori chimwe; saizvozvo achadaro ari maviri, ave kumakona maviri.

25 Zvino achava mapuranga masere nezvigadziko zvawo zvesirivha, zvigadziko gumi nezvitanhatu; zvigadziko zviviri pasi pepuranga rimwe nezvigadziko zviri pasi perimwe puranga.

26 Uchaitawo mbariro dzematanda emuakasia, shanu dzemapuranga dzerutivi rumwe rwetabhenakeri,

27 nembariro shanu dzemapuranga erumwe rutivi rwetabhenakeri, nembariro shanu dzemapuranga erutivi rwetabhenakeri kumativi eshure kumavirazuva.

28 Nembariro yepakati ngaive pakati pemapuranga, igure kubva kumapeto kusvika kumapeto.

29 Uchaputirawo mapuranga negoridhe; uitewo zvindori zvawo negoridhe, zvive nzvimbo dzembariro; uputire mbariro negoridhe.

30 Zvino uchasimudza tabhenakeri maererano nenzira yayo yakaratidzwa iwe mugomo.

31 Uchaitawo vheiri reruvara rwedenga neruvara rwehute nezvitsvuku nemucheka wakarukwa wakaisvonaka, basa renyanzvi; richaitwa nemakerubhi.

32 Zvino uchariremberedza pambiru ina dzemuakasia dzakaputirwa negoridhe; zvikorekedzo zvadzo zvive zvegoridhe, pazvigadziko zvina zvesirivha.

33 Uye ucharemberedza vheiri pasi pezvikorekedzo, kuti upinzepo areka yechipupuriro mukati mevheiri; uye vheiri iri richakuparadzanisirai pakati penzvimbo tsvene nenzvimbo tsvene-tsvene.

34 Uchaisawo chigaro chengoni pamusoro peareka yechipupuriro patsvene yedzitsvene.

35 Zvino uchaisa tafura panze pevheiri, nechigadziko chemwenje pakatarisana netafura kurutivi rwetabhenakeri kwakatarisa kuchamhembe; uye uchaisa tafura kurutivi rwekumaodzanyemba.

36 Uchaitirawo mukova wetende chiremberedzo cheruvara rwedenga neruvara rwehute nezvitsvuku nemucheka wakaisvonaka wakarukwa, basa remusoni.

37 Uitirewo chiremberedzo mbiru shanu dzemuakasia, ugodziputira negoridhe; zvikorekedzo zvadzo zvive zvegoridhe, uye uchazviumbira nekunyungudusa zvigadziko zvishanu zvendarira.