Ukungcwatshwa kukaJakobe

50UJosefa wasewela phezu kobuso bukayisea, wakhala inyembezi phezu kwakhe, wamanga. 2 UJosefa waselaya inceku zakhe abelaphi ukuthi baqhole uyise ngomuthi; labelaphi bamqhola uIsrayeli ngomuthib. 3 Zagcwaliseka kuye insuku ezingamatshumi amane, ngoba ngokunjalo zazigcwaliseka insuku zabaqholwe ngomuthi. LamaGibhithe amlilela insuku ezingamatshumi ayisikhombisac.

4 Kwathi sezidlulile insuku zokumkhalela, uJosefa wakhuluma lendlu kaFaro esithi: Uba-ke ngithole umusa emehlweni enud, ake likhulume endlebeni zikaFaro, lisithi: 5 Ubaba wangifungisa esithi: Khangela, ngiyafa; engcwabeni engazigebhela lonae elizweni leKhanani, lapho ungingcwabe. Khathesi-ke, ake ngenyuke ngiyengcwaba ubaba, besengibuya. 6 UFaro wasesithi: Yenyuka uyengcwaba uyihlo njengokukufungisa kwakhe.

7 UJosefa wasesenyuka ukuyangcwaba uyise, kwenyuka kanye laye zonke izinceku zikaFaro, abadala bendlu yakhe, labo bonke abadala belizwe leGibhithe, 8 lendlu yonke kaJosefa, labafowabo, lendlu kayise; kuphela abantwana babo abancinyane lezimvu zabo lenkomo zabo bakutshiya elizweni leGoshenif. 9 Kwasekusenyuka kanye laye konke izinqola labagadi bamabhiza, kwaba liviyo elinzima kakhulu. 10 Kwathi sebefike esizeni seAtadi, eliphetsheya kweJordani, balila khona, isililo esikhulu lesinzima kakhulu, bamenzela uyise isililo insuku eziyisikhombisa. 11 Kwathi abakhileyo belizwe, amaKhanani, bebona ukulila esizeni seAtadi, bathi: Lesi yisililo esinzima samaGibhithe. Ngakho basebesitha ibizo laso iAbeli-Mizirayimi1, eliphetsheya kweJordani. 12 Amadodana akhe asemenzela njalo njengalokhu ewalayile; 13 ngoba amadodana akhe amthwalela elizweni leKhananig, amngcwaba obhalwini lwensimu yeMakaphela, uAbrahama aluthenga lensimuh, lube yindawo yakhe yokungcwabela, kuEfroni umHethi, eqondane leMamre.

14 UJosefa wasebuyela eGibhithe, yena labafowabo labo bonke abenyuka laye ukuyangcwaba uyise, esemngcwabile uyise.

15 Kwathi abafowabo bakaJosefa sebebonile ukuthi uyise usefile bathi: Mhlawumbe uJosefa uzasizondai, ngoqotho asiphindisele ububi bonke esabenza kuye. 16 Basebenika isilayezelo kuJosefa besithi: Uyihlo walaya engakafi, esithi: 17 Lizakutsho kanje kuJosefa lithi: Ngiyakucela, akuxolele isiphambeko sabafowenu lesono sabo, ngoba bakwenzela okubi; khathesi-ke ake uxolele isiphambeko sezinceku zikaNkulunkulu kayihloj. UJosefa wasekhala inyembezi nxa bekhuluma kuye. 18 Labafowabo labo beza, bawa phansi phambi kwakhe, bathi: Khangela, siyizinceku zakho. 19 Kodwa uJosefa wathi kibo: Lingesabi, ngoba kanti ngisendaweni kaNkulunkulu yinik? 20 Kodwa lina laceba okubi kimi, uNkulunkulu waceba ngokuhlel, ukuze enze njengalamuhla, ukuze alondoloze abantu abanengi bephila. 21 Khathesi-ke lingesabi; mina ngizalondla lina labantwanyana benum. Wasebaduduza, wakhuluma labo ngomusa2.

Ukufa kukaJosefa

22 UJosefa wasehlala eGibhithe, yena lendlu kayise. Njalo uJosefa waphila iminyaka elikhulu letshumi. 23 UJosefa wasebona abantwana bakaEfrayimi abesizukulwana sesithathu; labantwana bakaMakirin indodana kaManase bazalelwa emadolweni kaJosefa. 24 UJosefa wasesithi kubafowabo: Ngiyafa, kodwa uNkulunkulu uzalihambela isibilio, alenyuse kulelilizwe alise elizweni alifungela oAbrahama, uIsaka loJakobep. 25 UJosefa wafungisa amadodana kaIsrayeli esithi: UNkulunkulu uzalihambela isibili, njalo lizakwenyusa amathambo ami asuke laphaq. 26 UJosefa wasesifa, eleminyaka elikhulu letshumi; basebemqhola ngomuthir, wafakwa ebhokisini eGibhithe.