Zvirevo zvaSoromoni

10Zvirevo zvaSoromoni.

Mwanakomana wakachenjera anofadza baba; asi mwanakomana benzi marwadzo kuna mai vake.

2 Fuma zhinji yezvakaipa haibatsiri; asi kururama kunonunura parufu.

3 Jehovha haaregi mweya weupenyu wewakarurama uchiva nenzara; asi anosundidzira chishuvo chevakaipa.

4 Anoshanda neruoko rwakaremberera anova murombo; asi ruoko rwevanoshingaira rwunofumisa.

5 Anounganidza muzhizha mwanakomana wakachenjera; asi anorara mukukohwa mwanakomana anonyadzisa.

6 Maropafadzo ari mumusoro mevakarurama; asi muromo wevakaipa unovanza kumanikidza.

7 Kurangarirwa kwewakarurama ndekweropafadzo; asi zita rewakaipa richaora.

8 Ane moyo wakachenjera anogamuchira mirairo; asi benzi pamiromo richawisirwa pasi.

9 Anofamba muchokwadi anofamba akachengeteka; asi anotsaudzira nzira dzake achazikanwa.

10 Anochonya ziso anouisa dambudziko; uye benzi pamiromo richawisirwa pasi.

11 Muromo wewakarurama chitubu cheupenyu; asi muromo wewakaipa unovanza kumanikidza.

12 Mbengo dzinomutsa gakava; asi rudo runofukidza zvitadzo zvose.

13 Pamiromo yeane njere panowanikwa uchenjeri; asi shamhu pamusana weanoshaiwa njere.

14 Vakachenjera vanozvichengetera ruzivo; asi muromo webenzi uri pedo nekuparadzwa.

15 Fuma yemufumi iguta rake rakasimba; kuparara kwevarombo urombo hwavo.

16 Basa rewakarurama ndereupenyu; zvinobudiswa newakaipa ndezvechivi.

17 Anoteerera kurairirwa ari panzira yeupenyu; asi anosiya kutsiurwa anotsausa.

18 Anovanza kuvenga ndewemiromo yenhema; neanobudisa guhwa ibenzi.

19 Pauwandu hwemashoko kudarika hakudereri; asi anodzora miromo yake ane uchenjeri.

20 Rurimi rwewakarurama isirivha yakasarudzwa; moyo wevakaipa wakaita sechinhu chidiki.

21 Miromo yewakarurama inofunda vazhinji; asi mapenzi anofa nekushaiwa ruzivo.

22 Ropafadzo yaJehovha ndiyo inofumisa; uye haiwedzeri dambudziko kwahwuri.

23 Kubenzi kuita zvakaipa kwakaita sekutamba; hwakadaro uchenjeri kumunhu wekunzwisisa.

24 Izvo wakaipa zvaanotya zvichamusvikira; asi chishuvo chewakarurama chichapiwa.

25 Sekupfuura kwechamupupuri, wakadaro wakaipa haapo; asi wakarurama inheyo yekusingaperi.

26 Sevhininga pamazino, uye seutsi pameso, wakadaro ari simbe kune vanomutuma.

27 Kutya Jehovha kunowedzera mazuva; asi makore evakaipa achapfupiswa.

28 Tariro yevakarurama mufaro; asi tarisiro yevakaipa ichaparara.

29 Nzira yaJehovha inhare kune wakarurama; asi kuparara kuvaiti vezvakaipa.

30 Wakarurama haazununguswi nekusingaperi; asi vakaipa havangagari panyika.

31 Muromo wewakarurama unobudisa uchenjeri; asi rurimi rwekutsauka kukuru rwuchagurwa.

32 Miromo yewakarurama inoziva chinhu chinofadza; asi muromo wewakaipa unoziva zvitadzo.