Nguvo tsvene

39Zvino nezveruvara rwedenga nezveruvara rwehute nezvitsvuku vakaita nguvo dzebasa kuita basa panzvimbo tsvene; uye vakaita nguvo tsvene dzaiva dzaAroni, Jehovha sezvaaiva araira Mozisi.

2 Wakaitawo efodhi yegoridhe, ruvara rwedenga, neruvara rwehute, nezvitsvuku, nemucheka wakaisvonaka wakarukwa.

3 Vakapfurawo goridhe kuita mabapa matete, ndokugura kuita rwonzi kubata pakati pezveruvara rwedenga, nepakati pezveruvara rwehute, nepakati pezvitsvuku, nepakati pemucheka wakaisvonaka, basa renyanzvi.

4 Vakaiitira mapandi emafudzi akabatanidzwa; akabatanidzwa pamicheto yayo miviri.

5 Nebhanhire reefodhi rayo raiva pamusoro payo, raiva pariri; zvichienderana nebasa raro regoridhe, zveruvara rwedenga, nezveruvara rwehute, nezvitsvuku, nemucheka wakaisvonaka wakarukwa, Jehovha sezvaakaraira Mozisi.

6 Vakagadzirawo mabwe eonikisi akaputirwa muzvirukwa zvegoridhe, afomborwa sekufomborwa kwechidhindo, nemazita evana vaIsraeri.

7 Zvino wakaaisa pamapandi emafudzi eefodhi, ave mabwe echirangaridzo kuvana vaIsraeri, Jehovha sezvaakaraira Mozisi.

8 Wakaitawo hombodo yechipfuva, basa renyanzvi, sebasa reefodhi; regoridhe, zveruvara rwedenga, nezveruvara rwehute, nezvitsvuku, nemucheka wakaisvonaka wakarukwa.

9 Yaiva yakaenzana mativi mana; vakaita hombodo yechipfuva yakapetwa kaviri; kureba kwayo kuri chanza, neupamhi hwayo chanza, yakapetwa kaviri.

10 Vakaisawo mairi mitsara mina yemabwe: Musara wesadhio, topasi, nekabhunakeri. Ndiwo musara wekutanga.

11 Nemusara wechipiri emaradhi, safiri, nedhaimani.

12 Nemusara wechitatu haikindi, neagati, neametisi.

13 Nemusara wechina bheriri, neonikisi, nejasipiri. Zvakaputirwa muzvirukwa zvegoridhe muzvitanga zvazvo.

14 Nemabwe zvichienderana nemazita evana vaIsraeri, gumi nemaviri, zvichienderana nemazita avo; kufombora kwechidhindo, rimwe nerimwe nezita raro, zvichienderana nemarudzi gumi nemaviri.

15 Nepahombodo yechipfuva vakaita maketani pamicheto, basa rakamonwa regoridhe rakazara.

16 Vakaitawo zvirukwa zviviri zvegoridhe, zvindori zviviri zvegoridhe, ndokuisa zvindori zviviri pamicheto miviri yehombodo yechipfuva.

17 Vakaisawo maketani maviri egoridhe akamonwa pazvindori zviviri pamicheto yehombodo yechipfuva.

18 Nemiromo miviri yemaketani akamonwa maviri vakaisa pazvirukwa zviviri ndokuzviisa pamapandi emafudzi eefodhi mberi kwayo.

19 Vakaitawo zvindori zviviri zvegoridhe, vakaisa pamicheto miviri yehombodo yechipfuva pamupendero wayo uri kurutivi rweefodhi mukati.

20 Vakaitawo zvindori zviviri zvegoridhe, vakazviisa pamafudzi maviri eefodhi pazasi nechemberi kwayo, pakatarisana nepakabatanidzwa payo, pamusoro pebhanhire reefodhi.

21 Zvino vakasunganidza hombodo yechipfuva nezvindori zvayo pazvindori zveefodhi nerwonzi rweruvara rwedenga kuti ive pamusoro pebhanhire reefodhi, kuti hombodo yechipfuva irege kusununguka paefodhi, Jehovha sezvaakaraira Mozisi.

22 Wakaitawo jazi reefodhi, basa rakarukwa, rose reruvara rwedenga.

23 Neburi rejazi pakati paro, seburi rejazi reutare, mupendero wakapoteredza buri raro, kuti risabvaruka.

24 Nepamipendero yejazi vakaita mapomegiranati zveruvara rwedenga nezveruvara rwehute nezvitsvuku, zvakarukwa.

25 Vakaitawo matare egoridhe rakazara; ndokuisa matare pakati pemapomegiranati pamupendero wejazi, kunhivi dzose, pakati pemapomegiranati;

26 dare nepomegiranati, dare nepomegiranati, pamipendero yejazi kupoteredza, kushumira, Jehovha sezvaakaraira Mozisi.

27 Vakaitirawo Aroni nevanakomana vake nguvo refu nemucheka wakaisvonaka nebasa rakarukwa,

28 nenguwani yemucheka wakaisvonaka, nenguwani dzakanaka dzemucheka wakaisvonaka, nezvikadubura zvemukati zvemucheka nemucheka wakaisvonaka wakarukwa,

29 nebhanhire, mucheka wakaisvonaka wakarukwa, nezveruvara rwedenga, nezveruvara rwehute, nezvitsvuku, basa remusoni, Jehovha sezvaakaraira Mozisi.

30 Vakaitawo hwendefa, korona tsvene, negoridhe rakazara, vakanyora pamusoro paro chinyorwa, sepakafomborwa pechidhindo vachiti: UTSVENE KUNA JEHOVHA.

31 Zvino vakasungira pariri rwonzi rweruvara rwedenga, kuti vasunganidze panguwani kumusoro, Jehovha sezvaakaraira Mozisi.

32 Zvino basa rose retabhenakeri yetende rekusangana rakapera; vana vaIsraeri ndokuita zvichienderana nezvose Jehovha zvaakaraira Mozisi; vakaita saizvozvo.

33 Zvino vakauya netabhenakeri kuna Mozisi, tende, nenhumbi dzaro dzose, zvikorekedzo zvaro, mapuranga aro, mbariro dzaro, nembiru dzaro, nezvigadziko zvaro;

34 nechifukidzo chematehwe emakondohwe akapendwa zvitsvuku, nechifukidzo chematehwe ezvikumba, nevheiri rechifukidzo;

35 areka yechipupuriro, nezvibatiso zvayo, nechigaro chengoni;

36 tafura, nhumbi dzayo dzose, nechingwa chekuratidza;

37 chigadziko chemwenje chakazara, mwenje yacho, mwenje yekurongedzwa, nemidziyo yacho yose, nemafuta echivhenekeso;

38 nearitari yegoridhe, nemafuta ekuzodza, nezvipfungaidzo zvinonhuhwira zvinotapira, nechiremberedzwa chemukova wetende;

39 aritari yendarira, nesefa yendarira yayaiva nayo, zvibatiso zvayo, nemidziyo yayo yose; dhishi, negumbo raro;

40 zviremberedzwa zvechivanze, mbiru dzazvo, nezvigadziko zvadzo, nechiremberedzwa chesuwo rechivanze, rwonzi rwacho, nehoko dzacho, nemidziyo yose yebasa retabhenakeri, retende rekusangana;

41 nguvo dzebasa dzekushanda panzvimbo tsvene, nguvo tsvene dzaAroni mupristi, nenguvo dzevanakomana vake, kuti vashumire paupristi.

42 Maererano nezvose Jehovha zvaakaraira Mozisi, saizvozvo vana vaIsraeri vakaita basa rose.

43 Zvino Mozisi wakatarisa basa rose, zvino tarira, vaiva variita Jehovha sezvaaiva avaraira, saizvozvowo vakariita; Mozisi ndokuvaropafadza.